Ամենայն Հայոց կաթողիկոս Գարեգին Բ-ն Կաթողիկե Սուրբ Էջմիածնի տոնի իր ուղերձում դատապարտել է եկեղեցու վերաբերյալ իշխանությունների հայտարարությունները, ինչպես նաև եկեղեցուն աջակցություն հայտնած «Տաշիր» ընկերությունների խմբի նախագահ Սամվել Կարապետյանի կալանավորումը։ Կաթողիկոսը հավատավոր ժողովրդի հետ աղոթք է բարձրացրել Բաքվում գերեվարված հայերի, ինչպես նաև Կարապետյանի ազատության համար:
Վեհափառը շեշտել է, որ դարեր շարունակ տարբեր ուժեր փորձել են սահմանափակել հայ եկեղեցու առաքելությունը և ենթարկեցնել իրենց շահերին։
«Այդ ճանապարհը, ցավալիորեն, կործանարար բաժանումներ է բերել ներազգային կյանքում։ Հավատավոր ժողովուրդը, սակայն, ունկնդիր Տիրոջ խոսքին, թե «ինքն իր մեջ բաժանված ամեն թագավորություն ավերվում է», միշտ պահպանել է իր միասնականությունը։ Այսօր էլ նման տագնապալի օրեր ենք ապրում։ Մեր երկրի բամաթիվ հիմնախնդիրների առջև միավորման ջանքերի փոխարեն շարունակվում են հասարակությանը պառակտելու ցավալի գործողությունները։ Իշխանությունների կողմից սանձազերծված հակաեկեղեցական արշավը լրջագույն սպառնալիք է ազգային մեր միաբանությանը, մեր երկրի ներքին կայունությանը, ուղիղ հարված՝ հայոց պետականությանը»,- նշել է կաթողիկոսը։
Գարեգին Բ-ն Կարապետյանի կալանավորումը դատապարտելի երևույթ է համարել։
«Ի պաշտպանություն Սուրբ Էջմիածնի հանդես եկող եկեղեցանվեր հայորդու՝ ազգային բարերարի դեմ իրականացվեց անօրինական հետապնդում։ Արդարև, ատելությամբ ու թշնամանքով բարիք չի ծնվի, բռնաճնշումներով երբեք երկիր չի կառուցվի, սպառնալիքի ու վախի մթնոլորտում արդարություն ու համերաշխություն չի հաստատվի։ Սուրբ Էջմիածինը հետևողականորեն շարունակելու է պաշտպանել ազգային շահերն ու իրավունքները, անխաթար պահել մեր ժողովրդի միաբանությունը, համախմբել համայն հայությանը՝ արիությամբ դիմագրավելու ազգային ու հայրենական կյանքի առջև ծառացած դժվարությունները, մարտահրավերները»,- ընդգծել է Գարեգին Բ-ն։
Կաթողիկոսը, իր խոսքն ուղղելով ուխտավորներին, հավելել է, որ Կաթողիկե Սուրբ Էջմիածնի տոնի առթիվ երկրպագության համար դուրս են բերվել Սուրբ Էջմիածնի սրբազան մասունքները։ Մայր Աթոռից ավելի վաղ հայտնել էին, որ Տիրոջ Կենաց Փայտի մասունքը, Աստվածամուխ Սուրբ Գեղարդը, Սուրբ Գրիգոր Լուսավորչի Աջը, Սուրբ Սահակ Պարթև Հայրապետի մասունքը, Սուրբ Գրիգոր Նարեկացու մասունքը, Հայոց Ցեղասպանության սուրբ նահատակների մասունքարանը, Սկևռայի մասանց պահարանը ժողովրդի երկրպագության համար կմնան մինչև 18։00-ն։
«Այս սրբությունների հրաշագործ զորությամբ մեր բարդ ու վտանգաշատ ժամանակներում փորձությունների մեջ մխիթարություն պետք է գտնենք, նեղությունները դիմագրավելու ուժ առնենք՝ կերտելու լուսավոր ապագա։ Պատգամում ենք ձեզ՝ հաստատուն մնացեք հավատքի մեջ, զորացեք, հավատարիմ մնացեք Քրիստոսահիմն Սուրբ Էջմիածնին, ձեր ինքնությանը, հաստատակամությամբ պաշտպանեք մեր պատմությունը, սրբազան արժեքները, մեր հավատքը»,- նշել է կաթողիկոսը։
Նա իր գնահատանքն է հայտնել հունիսի 22-ին Երևանից քայլերթով Մայր Աթոռ հասած քաղաքացիներին, որոնք իրենց զորակցությունն էին բերել եկեղեցուն, Գարեգին Բ-ին։ Նրանք իրենց աջակցությունն էին հայտնել նաև Կարապետյանին՝ պահանջելով ազատ արձակել նրան։
Եկեղեցուն աջակցող քայլերթին զուգահեռ և կաթողիկոսի ուղերձից առաջ՝ վարչապետ Նիկոլ Փաշինյանը շարունակել է հոգևորականներին ողղված գրառումներ անել՝ առաջարկելով հրապարակել եկեղեցական այն կանոնները, որոնցով կհիմնավորեն, թե «կաթողիկոսը կարող է զավակ ունենալ» (Փաշինյանը պնդում է, որ Գարեգին Բ-ն զավակ ունի-խմբ․)։
«Այսօրվա քարոզը լավ առիթ է, որ Կտրիճ Ներսիսյանը (այսպես է Փաշինյանը դիմում Գարեգին Բ-ին-խմբ․) հանրությանը ներկայացնի իր տիկնոջը և զավակին, պարզաբանի, թե իրեն հայտնի պոռնկացումներից հետո ինչո՞ւ է Սամվել Խաչատրյանին (Արշակ սրբազան-խմբ․) պահում վեղարի տակ, բացահայտի մոմի վաճառքի շահույթն ինչպե՞ս է բաշխվում Կարոյի և Եզրասի միջև․ 50/50, թե՞ այլ տրամաբանությամբ»,- գրել է վարչապետը։
Կարապետյանը հունիսի 17-ին մեկնաբանել էր Հայ Առաքելական եկեղեցու դեմ Հայաստանի իշխանությունների հայտարարությունները, որից հետո Ներքին գործերի նախարարության հատուկ նշանակության ստորաբաժանումները խուզարկություններ էին սկսել «Տաշիր» ընկերությունների խմբի նախագահի տանը՝ Երևանում։ Փաշինյանը խիստ էր արձագանքել Կարապետյանի հայտարարությանը:
ՆԳՆ-ից Armenia Today-ին մեկնաբանել էին, որ Կարապետյանի առանձնատան մոտ «մի խումբ անձինք բերման են ենթարկվել, իրականացվում են օպերատիվ գործողություններ»։ Խուզարկության մեկնարկից մոտ ութ ժամ անց՝ գիշերը ժամը երեքին, Կարապետյանը ոստիկանների ուղեկցությամբ դուրս էր եկել իր առանձնատնից և տեղափոխվել ՆԳՆ կազմակերպված հանցագործությունների դեմ պայքարի գլխավոր վարչություն, այնուհետև՝ Քննչական կոմիտե:
Ավելի ուշ ՔԿ-ն Armenia Today-ին հայտնել էր իշխանությունը զավթելու կոչեր անելու մեղադրանքով Կարապետյանին կալանավորելու միջնորդության մասին։ Ինքը՝ գործարարը, չի ընդունում մեղադրանքը և մտադիր է բողոքարկել այն բոլոր ատյաններում։ Կարապետյանի մամուլի ծառայությունն այս մեղադրանքներն անվանել էր ակնհայտ վախեցնելու և բռնաճշման փորձ։
Հունիսի 19-ին դատարանը երկու ամսով կալանավորել էր Կարապետյանին:
Դիտեք նաև՝
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
