Ներքին գործերի նախարարության հատուկ նշանակության ստորաբաժանումները խուզարկություններ են անցկացնում «Տաշիր» ընկերությունների խմբի նախագահ Սամվել Կարապետյանի տանը Երևանում: Տեղեկությունը հայտնել են Armenia Today-ի աղբյուրները։
Խուզարկություններն սկսվել են, երբ գործարարը հրապարակայնորեն քննադատել է Հայաստանի իշխանությունների հայտարարություններն Ամենայն Հայոց կաթողիկոսի և Հայ Առաքելական եկեղեցու դեմ:
Ավելի ուշ ՆԳՆ-ից Armenia Today-ին մեկնաբանել են, որ Կարապետյանի առանձնատան մոտ «մի խումբ անձինք բերման են ենթարկվել, իրականացվում են օպերատիվ գործողություններ»։
ՀՀ վարչապետ Նիկոլ Փաշինյանը Կարապետյանի հայտարարությունից հետո սպառնացել էր «ընդմիշտ պասիվացնել եկեղեցու ղեկավարությանը պաշտպանող ակտիվացած բարեգործներին», սակայն չէր պարզաբանել, թե կոնկրետ ում մասին է խոսքը։
Ավելի ուշ ՔՊ խմբակցության քարտուղար Արթուր Հովհաննիսյանը ճեպազրույցում ասել է, որ հորդորում է Կարապետյանին զբաղվել ՀԷՑ-ով ու դրա որակով, ավարտել Կրկեսի շինարարությունը, իրականացնել շինարարությունն այնտեղ, որտեղ չի ավարտել։
«Թե չէ մենք՝ որպես ՀՀ իշխանություն, ինստիտուցիոնալ ձևով զբաղվելու ենք քո հարցով։ Սա է մեր նախազգուշացումն ի պատասխան տվյալ անձնավորության անիմաստ հայտարարությունների»,- նշել է Հովհաննիսյանը։
Լրագրողների հարցին, թե օրինակ ի՞նչ են անելու, Հովհաննիսյանն ասել է, որ կարող են զբաղվել ՀԷՑ-ի ազգայնացման կամ Կրկեսի՝ պետությանը վերադարձնելու հարցերով։
«Յուրաքանչյուր մարդ, որը գալիս է ՀՀ ինչ-որ օտար երկրից, փորձում է սպառնալ ժողովրդի կողմից ընտրված իշխանություններին, այդ մարդու օդերը փակելու ենք, թող գնան, իրենց ներդրումն իրենց տերերի մոտ անեն»,- զգուշացրել է պատգամավորը։
Մայիսի 29-ին Փաշինյանը սոցիալական ցանցերում մի շարք վիրավորական գրառումներ էր հրապարակել Հայ Առաքելական եկեղեցու ներկայացուցիչների դեմ, իսկ ավելի ուշ կոչ արել ընտրել նոր կաթողիկոս։
Հունիսի 2-ին Փաշինյանը կասկածի տակ էր դրել այն փաստը, որ Գարեգին Բ-ն պահպանել է կուսակրոնության երդումը։ Այնուհետև Փաշինյանը հայտարարել էր կաթողիկոսին փոխելու համար համակարգող խումբ ստեղծելու մասին։ Կարապետյանը, ինչպես նաև Ռուսաստանում գործող 10-ից ավելի հայկական կազմակերպություն, հանդես էր եկել հակաեկեղեցական արշավի դեմ։ «Հայաքվե» նախաձեռնությունն առաջարկել էր ստեղծել համազգային հասարակական մարմին՝ եկեղեցին պաշտպանելու նպատակով։
