ՀՀ փոխվարչապետ Մհեր Գրիգորյանը Ռուսաստանի օրվան նվիրված միջոցառման ժամանակ ելույթի ժամանակ Ռուսաստանի հետ տարաձայնությունները հաղթահարելու հույս է հայտնել։
«Հույս ենք հայտնում, որ առկա հարցերն ու տարաձայնությունները կհաղթահարվեն բաց երկխոսության շնորհիվ, իսկ Հայաստանի Հանրապետության և Ռուսաստանի Դաշնության միջև հարաբերությունները հետագայում ևս կզարգանան փոխըմբռնման, փոխադարձ հարգանքի և բարիդրացիության ոգով՝ ի բարօրություն մեր պետությունների և ժողովուրդների»,- ասել է նա։Նա շեշտել է, որ Հայաստանին և Ռուսաստանին կապում են դարավոր պատմական հարաբերություններ, որոնք հիմնված են փոխադարձ հարգանքի, ամուր բարեկամության և մեր ժողովուրդների միջև սերտ հումանիտար կապերի վրա։
«Մենք բարձր ենք գնահատում մեր համագործակցության պատմությունը և համոզված ենք, որ երկկողմ փոխգործակցության հետագա զարգացումը բխում է երկու երկրների շահերից և նպաստում է տարածաշրջանում կայունության և բարեկեցության ամրապնդմանը»,- ասել է Գրիգորյանը։
Նա հավելել է, որ երկկողմ համագործակցության կուտակված փորձը երկարաժամկետ, հիմնարար և արժեքավոր ակտիվ է, որն անհրաժեշտ է պահպանել միջազգային հարաբերությունների յուրաքանչյուր կոնֆիգուրացիայի դեպքում:
Այսօր ավելի վաղ ՀՀ վարչապետ Նիկոլ Փաշինյանը շՌԴ նախագահ Վլադիմիր Պուտինին ուղղված ուղերձում վստահություն էր հայտնել, որ Հայաստանի և Ռուսաստանի ժողովուրդների միջև բազմակողմ կապերը, ինչպես նաև փոխադարձ ինքնիշխանության և պետական շահերի հարգման վրա հիմնված բաց ու կառուցողական երկխոսությունը շարունակելու են նպաստել երկկողմ համագործակցության ամրապնդմանը և առկա ներուժի լիարժեք օգտագործմանը։
Մոսկվայի և Երևանի հարաբերությունները լարվել են՝ հայկական կողմից ՀԱՊԿ գործունեության քննադատության և Հայաստանի՝ Եվրամիության հետ կապերի ընդլայնման շուրջ հայտարարությունների շրջափուլում։
Այս փուլում ՌԴ-ն սահմանափակել է ՀՀ-ից մի շարք ապրանքների ներմուծումը, կասեցրել ՌԴ-ում գտնվող խմբաքանակների իրացումը։ Ապրանքների թվում են ծաղիկները, «Ջերմուկ» հանքային ջուրը, խմիչքի առանձին խմբաքանակներ, մրգեր, բանջարեղեն, ինչպես նաև չրեր։ Հայկական ընկերությունների կողմից ձկան և ձկնամթերքի ներկրումը կասեցվել էր հունիսի 1-ին։
Դիտեք նաև՝
Ծաղիկները սպասում են ընտրություններին
Փաշինյանը սուբսիդիաներ է խոստացել ՌԴ սահմանափակումներից տուժած բիզնեսին
