ՀՀ վարչապետ Նիկոլ Փաշինյանը շնորհավորական ուղերձ է հղել ՌԴ նախագահ Վլադիմիր Պուտինին՝ Ռուսաստանի օրվա առթիվ, հայտնում է ՀՀ կառավարությունը։
Վարչապետը նշել է, որ Ռուսաստանի օրը խորհրդանշում է ՌԴ քաղաքացիների պատասխանատվությունը երկրի ապագայի նկատմամբ, ինչպես նաև պետության զարգացման ուղին ինքնուրույն ընտրելու ռուս ժողովրդի ձգտումը։
Փաշինյանը վստահություն է հայտնել, որ Հայաստանի և Ռուսաստանի ժողովուրդների միջև բազմակողմ կապերը, ինչպես նաև փոխադարձ ինքնիշխանության և պետական շահերի հարգման վրա հիմնված բաց ու կառուցողական երկխոսությունը շարունակելու են նպաստել երկկողմ համագործակցության ամրապնդմանը և առկա ներուժի լիարժեք օգտագործմանը։
Նա նաև Պուտինին մաղթել է հաջողություններ պետական գործունեության մեջ, իսկ Ռուսաստանի ժողովրդին՝ բարօրություն և բարգավաճում։
Մոսկվայի և Երևանի հարաբերությունները լարվել են՝ հայկական կողմից ՀԱՊԿ գործունեության քննադատության և Հայաստանի՝ Եվրամիության հետ կապերի ընդլայնման շուրջ հայտարարությունների շրջափուլում։
Այս փուլում ՌԴ-ն սահմանափակել է ՀՀ-ից մի շարք ապրանքների ներմուծումը, կասեցրել ՌԴ-ում գտնվող խմբաքանակների իրացումը։ Ապրանքների թվում են ծաղիկները, «Ջերմուկ» հանքային ջուրը, խմիչքի առանձին խմբաքանակներ, մրգեր, բանջարեղեն, ինչպես նաև չրեր։ Հայկական ընկերությունների կողմից ձկան և ձկնամթերքի ներկրումը կասեցվել էր հունիսի 1-ին։
Դիտեք նաև՝
Ծաղիկները սպասում են ընտրություններին
Փաշինյանը սուբսիդիաներ է խոստացել ՌԴ սահմանափակումներից տուժած բիզնեսին
