«Հայաստանի էլեկտրական ցանցեր» փակ բաժնետիրական ընկերության ղեկավարությունը, որի սեփականատիրոջը՝ «Տաշիր» ընկերությունների խմբի» նախագահ Սամվել Կարապետյանին, կալանավորել են եկեղեցուն աջակցություն հայտնելուց հետո, չի բացառում, որ ընկերության շուրջ ընդհանուր գործընթացների, այդ թվում՝ իշխանությունների կողմից այն պետականացնելու հիմքով կարող է դիմել նաև միջազգային ատյաններ։ Այդ մասին ընկերության գլխավոր տնօրենի պաշտոնակատար Դավիթ Ղազինյանը հայտնել է հունիսի 30-ին տեղի ունեցած ասուլիսին՝ ի պատասխան Armenia Today-ի հարցի։
Ղազինյանը հստակեցրել է, որ այս պահին իրավական որևէ գործընթաց չեն սկսել, քանի որ մի «անգրագետ նախագծից բացի» ոչինչ չկա (ՀԷՑ-ն ազգայնացնելու իշխանությունների օրինագիծը-AT)։ Միևնույն ժամանակ՝ նա շեշտել է՝ ընկերության սեփականատերը պետականամետ մարդ է, և ՀԷՑ-ը պատրաստ է իրավական բոլոր ճանապարհներով պայքարել ընկերության շուրջ գործընթացների դեմ։
Ղազինյանն ընդգծել է, որ ընկերության նկատմամբ իշխանությունների նախաձեռնած գործընթացները որևէ հիմք չունեն։
«Փորձում եմ գտնել Կարապետյանի մեղքը, ՀԷՑ-ի մեղքը, ազնվորեն ասեմ՝ չեմ գտնում։ Թող հուշեն՝ ասեն, ո՞րն է այդ մեղքը։ Մեղքի չափաբաժին գոյություն ունի, այսինքն՝ պետք է լինի այնպիսի մեղավորություն, որը կհանգեցնի պետականացման։ Լուրջ չէ գալն ու ասելը՝ Հայաստանի մի տարածքում օրը երեք անգամ հոսանքն անջատվեց»,- հստակեցրել է նա։
Ընկերության գլխավոր տնօրենի պաշտոնակատարի խոսքով՝ ՀԷՑ-ի դեմ պայքար է տարվում ոչ օրինաչափ, «մարտեր առանց կանոնների» ձևաչափով։
«Մենք հասկանում ենք, որ ներպետական բոլոր հնարավորությունները մեզ համար սահմանափակ են, սակայն կան միջազգային կազմակերպություններ։ Միջազգային մեր գործընկերներից շատ վատ արձագանքներ ենք ստանում։ Նրանք զարմացած ու ապշած են»,- նշել է Ղազինյանը։
ՀԷՑ-ի գլխավոր տնօրենի պաշտոնակատարը հավելել է, որ Հանրային ծառայությունները կարգավորող հանձնաժողովը երբեք ընկերության աշխատանքը չի գնահատել «այնքան վատ», ինչը կարող էր իշխանությունների կողմից ՀԷՑ-ի դեմ պայքարին հանգեցնել։ Նա տեղեկացրել է, որ Հայաստանի ամբողջ տարածքում հոսանքազրկումների միջին հաճախականության ցուցանիշը Երևանում 2022 թվականի համեմատ բարելավվել է 8,7%-ով, անջատումների միջին տևողությունը բարելավվել է 18,1%-ով, իսկ հոսանքազրկումների վերականգնման տևողությունը՝ 12,85%-ով։
Ղազինյանը նշել է, որ ըներությունը «Տաշիր» ընկերությունների խմբի» կողմից ձեռք բերելուց հետո՝ 2015-ին, չի բարձրաձայնել խնդիրների մասշտաբները, որոնք առկա էին այդ ժամանակ։
«Երևի մեր սխալն էր, որ այդ շատ վատ վիճակը մանրամասն չներկայացրինք։ Դրանից հետո կազմվել է ներդրումային ծրագիր, ներգրավվել են միջազգային գործընկերներ։ Այդ ժամանակ սկսել ենք տանել աշխատանքներ այդ վիճակը կամաց-կամաց միջազգային զարգացած երկրների փորձին համապատասխանացնելու ուղղությամբ»,- ասել է նա։
Ղազինյանը մեկնաբանել է նաև լուրերը, թե իշխանությունները խոստացել են ընկերությունն ազգայնացումից հետո 30%-ով բարձրացնել ՀԷՑ-ի աշխատակիցների աշխատավարձերը՝ դրանք միֆ անվանելով։ Նրա խոսքով՝ դա հնարավոր է միայն էլեկտրաէներգիայի սակագնի բարձրացման հաշվին։
«Աշխատավարձերը բարձրացնելու համար մոտ 3 մլն մարդ կսկսի էլեկտրաէներգիաի համար ավելի շատ վճարել, որպեսզի 6800 մարդ ավելի շատ գումար ստանա։ Այսինքն՝ միանշնակ սակագնի խնդիր է առաջանալու»,- հայտարարել է Ղազինյանը։
Նա հավելել է, որ էլեկտրաէներգիայի սակագնի աճն ընկերությունը զսպել է կորուստների տոկոսը նվազեցնելու և դրա արդյունքում լրացուցիչ ֆինանսական միջոցների գեներացման հաշվին։ ՀԷՑ-ի տնօրենի պաշտոնակատարը հիշեցրել է, որ 2016 թվականից սկսած՝ էլեկտրաէներգիայի սակագինը բարձրացել է 4,8 դրամով, որի մեջ ընկերության մասնաբաժինը 0 դրամ է։
«2016-ից հետո սակագինը բարձրացվել է ոչ թե ՀԷՑ-ի, այլ արտադրողի, տեղափոխողի նախաձեռնությամբ։ Բնակչությունը պատկերացնում է, թե ինչ վճարում են՝ ամբողջությամբ ՀԷՑ-ինն է։ Ամբողջը ՀԷՑ-ինը չէ, քանի որ ունենք արտադրող, փոխադրող և բաշխող, ՀԷՑ-ը բաշխողն է, որն արտադրող կայան չունի»,- շեշտել է նա։
Ղազինյանը վստահեցրել է, որ էլեկտրաէներգիայի սակագնի բարձրացում չի նախատեսվում։
«Այն, ինչ այսօր ունենք, այդ հիմքով էլեկտրաէներգիայի սակագին չի բարձրանալու։ Բայց մենք գնում ենք մի տեղ, ուր կա մեծ ռիսկ, որ էլեկտրաէներգիաի սակագինն ավելանալու է»,- նշել է նա։
Փաշինյանը ՀԷՑ-ը պետականացնելու մտադրության մասին հայտարարել էր, երբ Կարապետյանը հունիսի 17-ին մեկնաբանել էր Հայ Առաքելական եկեղեցու դեմ Հայաստանի իշխանությունների հայտարարությունները: Կարապետյանի հայտարարություններից հետո նրա տանը խուզարկություններ էին կատարվել։ Հետո նրա նկատմամբ քրեական հետապնդում էր սկսվել իշխանությունը զավթելու կոչեր անելու մեղադրանքով։ Փաշինյանի հայտարարությանը հաջորդել էր նաև Հանրային ծառայությունները կարգավորող հանձնաժողովի՝ ՀԷՑ-ին խախտումների համար 10 մլն դրամ գումարի չափով տուգանելու որոշումը։
Հունիսի 19-ին դատարանը երկու ամսով կալանավորել էր «Տաշիր» ընկերությունների խմբի նախագահին։ Կարապետյանին, ում ընկերությունը ՀԷՑ-ը գնելուց ի վեր շուրջ 700 մլն դոլար է հատկացրել էլեկտրամատակարարման որակի բարձրացմանը, Փաշինյանը մեղադրել էր ժողովրդին վնաս հասցնելու և դիտավորյալ անջատումներ կազմակերպելու մեջ։
Կարդացեք նաև՝
ՀԷՑ-ի պետականացման պլանը պատրաստ է․ Փաշինյան
ՀԷՑ-ի անձնակազմը լիակատար աջակցություն է հայտնել Սամվել Կարապետյանին
«Շատ վատ», «անհիմն», «անխղճություն». քաղաքացիները՝ Կարապետյանի կալանավորման մասին
