ԵՄ-ն չի կարողանա զորքեր տեղակայել Ուկրաինայում մի շարք պատճառներով. այնտեղ խաղաղապահ ուժերի տեղակայումը հնարավոր է միայն ՄԱԿ-ի միջոցով, ասել է Եվրախորհրդարանի բելգիացի պատգամավոր Ռուդի Քեննեսը, գրում է «ՌԻԱ Նովոստին»։
ԱՄՆ նախագահ Դոնալդ Թրամփը երեքշաբթի օրը հայտարարել էր, որ Ֆրանսիան, Գերմանիան և Մեծ Բրիտանիան ցանկանում են զորքեր տեղակայել Ուկրաինայի տարածքում։ Նա հավելել էր, որ իր նախագահության ընթացքում Ուկրաինայում ամերիկյան զորքեր չեն լինի։
Եվրախորհրդարանի պատգամավորը նշել է, որ նման բան տեղի չի ունենա։
«Ես չեմ կարող հաստատ ասել, բայց իմ կարծիքով՝ ՌԴ նախագահ Վլադիմիր Պուտինը և Թրամփն արդեն որոշել են այս հարցը։ Կարծում եմ՝ խաղաղապահ ուժերի ցանկացած միջամտություն կամ տեղակայում հնարավոր է միայն ՄԱԿ-ի միջոցով»,- ասել է Քեննեսը՝ պատասխանելով Ուկրաինայում եվրոպական զորքերի հնարավոր տեղակայման մասին հարցին։
Նրա կարծիքով՝ եվրոպացիները, նախևառաջ, չեն կարողանա դա անել ռազմական տեսանկյունից։ Պատգամավորը չափազանց անհարմար է անվանել ԵՄ առաջնորդների հանդիպումը Թրամփի հետ Սպիտակ տանը։
«Կարծում եմ՝ սա մեծ հիասթափություն է և՛ աջերի, և՛ ձախերի համար։ Նրանցից ոչ ոք նման բան չէր սպասում։ Զգացողություն էր, որ այս սեղանի շուրջ նստած մեկը ձեռքում նռնակ էր պահում, ապա քաշում էր օղակը և նետում ուրիշի վրա։ Եվ բոլորը պետք է համոզվեին, որ այն չի պայթի։ Եվ այս մարդիկ դեռևս իրենց առաջնորդներ են անվանում»,- նշել է Քեննեսը։
ՌԴ և ԱՄՆ նախագահները բանակցություններ էին վարել օգոստոսի 16-ի գիշերը։ Հանդիպումից հետո կողմերը, մասնավորապես, հայտարարել էին, որ համաձայնության են եկել Ուկրաինայի վերաբերյալ որոշ կետերի շուրջ, բայց մի շարք հարցերի առումով դեռևս համաձայնություն չկա։ Պուտինը շեշտել էր, որ առճակատման ժամանակն անցել է, և Թրամփին հրավիրել էր Մոսկվա։
Օգոստոսի 18-ին Թրամփը Սպիտակ տանը հանդիպել էր Ուկրաինայի նախագահ Վլադիմիր Զելենսկու հետ։ Զելենսկին հայտարարել էր, որ ԱՄՆ-ից զենքի գնումը կլինի Ուկրաինայի անվտանգության երաշխիքների մի մասը։
