ԱՄՆ նախագահ Դոնալդ Թրամփը Ուկրաինայի նախագահ Վլադիմիր Զելենսկու հետ հանդիպմանը ՌԴ նախագահ Վլադիմիր Պուտինի մասնակցությամբ եռակողմ հանդիպում անցկացնելու հնարավորության վերաբերյալ վստահություն է հայտնել, փոխանցում է ՏԱՍՍ-ը։
Թրամփը նշել է, որ Անքորիջում Ռուսաստանի նախագահի հետ իր հանդիպումը լավ է անցել, և կա արդյունքներ ստանալու հնարավորություն։ Ըստ նրա՝ Եվրոպան պատրաստ է Ուկրաինային տրամադրել անվտանգության երաշխիքներ, ԱՄՆ-ն կօգնի այդ հարցում։ Թրամփը չի բացառել, որ օրվա վերջում կհայտարարի Ուկրաինայում ամերիկյան զորքեր տեղակայելու հնարավորության մասին։
Նրա համոզմամբ՝ Ուկրաինայում հակամարտության կարգավորումը պետք է լինի երկարաժամկետ։
Թրամփը նաև շեշտել է, որ Ուկրաինայում հրադադարը խաղաղության համաձայնագրի կնքման նախապայման չէ, քանի որ կողմերը կարող են համաձայնության գալ մարտական գործողությունների ընթացքում։ Նա հավելել է, որ Զելենսկու հետ հանդիպումից անմիջապես հետո կզանգահարի Պուտինին։
Զելենսկին իր հերթին հայտարարել է, որ ԱՄՆ-ից զենքի գնումը կլինի Ուկրաինայի անվտանգության երաշխիքների մի մասը։ Նա նաև ասել է, որ պատրաստ է Ռուսաստանի և ԱՄՆ նախագահների հետ եռակողմ հանդիպման։
Վաշինգտոնում այսօրվա բանակցություններին նախորդել էր օգոստոսի 16-ի գիշերը Պուտինի և Թրամփի միջև հանդիպումը։ Հանդիպումից հետո կողմերը հայտարարել էին, որ Ուկրաինայի վերաբերյալ որոշ կետերի շուրջ համաձայնության են եկել, սակայն մի շարք հարցերի շուրջ համաձայնության հասնել չէր հաջողվել։ Ավելի ուշ լրատվամիջոցները հայտնել էին Ուկրաինայում հակամարտությունը կարգավորելու ռուսական առաջարկի մասին։
