ՌԴ անվտանգության խորհրդի փոխնախագահ Դմիտրի Մեդվեդևը հայտարարել է, որ ՀՀ վարչապետ Նիկոլ Փաշինյանը «Ռուսաստանի հետ խզման ուղեգիծ է վերցրել»։ Այդ մասին նա հայտնել է «Ռիա Նովոստիին»-ին։
«Փաշինյանին թվում է, թե տարբեր քաղաքական հոսանքների միջև մանևրելով՝ կարող է Արևմուտքում արհեստական հեղինակություն ձեռք բերել՝ վտանգելով մեր երկրի հետ կապերը»,- ասել է Մեդվեդևը։
Մեդվեդևի խոսքով՝ Փաշինյանն ուղղակիորեն վտանգել է Ռուսաստանի, ՀԱՊԿ-ի և Եվրասիական տնտեսական միության (ԵԱՏՄ) հետ հարաբերությունները, և նրա գործողությունները հետևանքներ կունենան։ Մեդվեդևը հայտարարել է, որ Փաշինյանը, որպես ՀՀ կառավարության ղեկավար, չի գնահատել Մոսկվայից եղբայրական օգնության և աջակցության բազմաթիվ օրինակներ։
«ՀՀ-ն Եվրասիական տնտեսական համագործակցության անդամակցության ամենամեծ շահառուներից մեկն է։ Այսօր նա ուղղակիորեն վտանգել է մեր հարաբերությունները։ Նա էապես խզել է կապերը ՀԱՊԿ-ի հետ, չնայած հենց ՀԱՊԿ-ի շրջանակներում է Ռուսաստանը միշտ պատրաստ պաշտպանել Հայաստանն իր կողմից ճանաչված սահմաններում։ Նա հրաժարվել է մասնակցել ԵԱՏՄ գագաթնաժողովներին և Ռուսաստանի նողկալի թշնամիներին հավաքում է Երևանում»,- ասել է նա։
Մեդվեդևը հավելել է, որ ՀՀ վարչապետը Հայաստանին տանում է Ուկրաինայի ճանապարհով։
«Մտածեք այդ մասին. այս շատ յուրահատուկ անհատի գործողությունների արդյունքում ՀՀ ժողովուրդը կկորցնի ռուսական շուկան, ամբողջ Եվրասիական տնտեսական միությունը և տասնամյակների ընթացքում կառուցված տնտեսական կապերը»,- հավելել է նա։
Նրա խոսքով՝ Ռուսաստանի և Հայաստանի հարաբերությունների զարգացման համար անհրաժեշտ է կառուցողական ղեկավարություն Երևանում։
«Մենք պատրաստ ենք զարգացնել արդյունավետ, փոխշահավետ համագործակցություն և հավասար փոխազդեցություն Հայաստանի և հայ ժողովրդի հետ։ Բայց որպեսզի դա տեղի ունենա, մեր դաշնակիցը պետք է ունենա կառուցողական ղեկավարություն, որը պատրաստ է բարեկամանալ Ռուսաստանի հետ»,- նշել է նա։
Մոսկվայից հնչող կոշտ քննադատության ֆոնին ՌԴ-ն սահմանափակել էր ՀՀ-ից մի շարք ապրանքների ներմուծում։ «Ռոսսելխոզնադզորը» հայտնել էր, որ մայիսի 22-ից ժամանակավոր սահմանափակումներ է մտցնում Հայաստանից ծաղիկների ներկրման նկատմամբ, կասեցրել «Ջերմուկ» հանքային ջրի բոլոր խմբաքանակների ներմուծումը։
«Ռոսպոտրեբնադզորը» խախտումներ հայտնաբերելուց հետո կասեցրել էր նաև Հայաստանից ներկրված ալկոհոլային արտադրանքի առանձին խմբաքանակների իրացումը։
Մայիսի 22-ին ՌԴ փոխվարչապետ Ալեքսեյ Օվերչուկը հայտարարել էր, որ Եվրամիությանն անդամակցելու որոշման պարագայում Հայաստանը կկորցնի որոշակի արտոնություններ, երկրի համար կսահմանվեն մաքսատուրքեր, ինչպես նաև կփոխվեն գազի և էլեկտրաէներգիայի սակագները։ ՌԴ նախագահ Վլադիմիր Պուտինը կոչ էր արել հայկական իշխանություններին կողմնորոշվել ԵԱՏՄ-ի և ԵՄ-ի միջև, իսկ ՌԴ ԱԳ նախարար Սերգեյ Լավրովն ավելի վաղ զգուշացրել էր ԵԱՏՄ արտոնությունների հնարավոր կորստի մասին:
Կարդացեք նաև՝
Լավրովի ու Մեդվեդևի նախազգուշացնող հայտարարությունները՝ հասցեագրված Երևանին
