Արագածոտնի թեմի 19 քահանա և երկու սարկավագ հայտարարել են, որ հոկտեմբերի 26-ի առավոտյան Արագածոտնի մարզի եկեղեցիներում պատարագ են մատուցելու և այդ օրը չեն կարողանալու ներկայանալ քննչական մարմին։
Հոգևորականները նշել են, որ ոստիկանության ծառայողների միջոցով հոկտեմբերի 24-ին տարբեր ժամերի (այդ թվում՝ ուշ երեկոյան, գիշեր) ստացել են Քննչական կոմիտեի Երևանի քննչական վարչության ավագ քննիչ Նազելի Սարգսյանի անունից տրված ծանուցագրերի պատճեններ, որոնց համաձայն պետք է բոլորը հոկտեմբերի 26-ին՝ կիրակի օրը, ժամը 09:00-ին նույն քրեական վարույթով ներկայանան քննչական մարմին՝ Երևան քաղաքում:
Նրանք հիշեցրել են, որ ՀՀ սահմանադրությամբ Հայաստանյայց Առաքելական սուրբ եկեղեցին իրավունք ունի կատարել ժամերգություններ, ծեսեր, իսկ պետությունն իրավունք չունի միջամտել եկեղեցու ներքին կյանքին:
Նրանք նշել են, որ հոկտեմբերի 26-ի առավոտյան Արագածոտնի մարզի եկեղեցիներում պատարագ են մատուցելու, քանի որ հակառակ դեպքում՝ կխախտեն իրենց հոգևոր պարտականությունները և կթողնեն հավատացյալներին առանց սուրբ հաղորդության։
Բացի այդ, բոլորը որպես վկա հարցաքննությանը ցանկանում են ներկայանալ միայն փաստաբանների հետ, մինչդեռ ոչ աշխատանքային կիրակի օրով իրենք չեն կարողանալու ապահովել փաստաբանների ներկայությունը (քահանաներից մի քանիսին նույն փաստաբանն է ներկայացնում, որը նույնպես խոչընդոտ է նույն ժամին հարցաքննությանը մասնակցելու համար): Հոգևոր հայրերը շեշտել են, որ առանց փաստաբանի ներկայության չեն պատրաստվում ցուցմունք տալ:
Թեմի հոգևորականները կոչ են արել քննչական մարմնին իրենց հրավիրել հարցաքննության որևէ այլ օր, նախապես՝ առնվազն երկու օր առաջ ծանուցելով հարցաքննության մասին (ծանուցագրերը հանձնվել են նաև այդ պահանջի խախտմամբ): Նրանք նաև անհանգստությունն են հայտնել Քննչական կոմիտեի վարքագծի վերաբերյալ, որով փորձ է արվում մի ամբողջ մարզ թողնել առանց պատարագի:
Հոկտեմբերի 24-ին փաստաբան Արա Զոհրաբյանը հայտնել էր, որ Տեր Սարգիս քահանա Սարգսյանին, ով պետք է հոկտեմբերի 26-ին Հովհաննավանքում կատարեր պատարագ, նույն օրը ժամը 09:00-ին քննչական մարմինը հրավիրել է հարցաքննության։
Հոկտեմբերի 15-ին Արագածոտնի թեմի առաջնորդարանում և հոգևորականների տան խուզարկություններից հետո բերման էր ենթարկվել 12 հոգևորական։ Կալանավորվել էին թեմի առաջնորդ Մկրտիչ եպիսկոպոս Պռոշյանը և Մուղնիի Սուրբ Գևորգ եկեղեցու հոգևոր հովիվ Գարեգին քահանա Արսենյանը, թեմի հաշվապահի նկատմամբ տնային կալանք էր կիրառվել։ Ամենայն Հայոց կաթողիկոս Գարեգին Բ-ի տնօրինությամբ, Մայր Աթոռ Սուրբ Էջմիածնի Պարգևների շնորհման և կարգապահական հարցերի հանձնախմբի եզրակացության հիման վրա, Արագածոտնի թեմի հոգևոր սպասավոր Տեր Արամ քահանա (Ստեփան՝ աշխարհիկ անվամբ-խմբ.) Ասատրյանը հոկտեմբերի 21-ին կարգալույծ էր հռչակվել։
Թեպետ կարգալույծ լինելուն՝ Ասատրյանը հոկտեմբերի 21-ին հայտարարել էր, որ հոկտեմբերի 26-ին Հովհաննավանքում պատրաստվում է պատարագ մատուցել։ Նույն օրը վարչապետ Նիկոլ Փաշինյանը տեղեկացրել էր, որ մասնակցելու է պատարագին։ ԱԺ-ում էլ վերահաստատել էր դիրքորոշումը՝ նշելով, որ ոչ թե Ասատրյանն, այլ Գարեգին Բ-ն է «կարգալույծ»։
