Վարչապետ Նիկո Փաշինյանն ԱԺ-կառավարություն հարցուպատասխանին հայտարարել է, որ պատրաստվում է մի շարք եկեղեցիներ, այդ թվում՝ Հովհաննավանքը, վերադարձնել կառավարության հաշվեկշիռ։
Նա այդպես է արձագանքել՝ մեկնաբանելով Գարեգին Երկրոդի կողմից Հովհաննավանքի հոգևոր հովիվ Արամ քահանա Ասատրյանին (այժմ՝ Ստեփան Ասատրյան-խմբ.) կարգալույծ անելու որոշմանը։
«Եթե ես ճիշտ գիտեմ՝ Հովհաննավանքը, ինչպես բազմաթիվ այլ հուշարձաններ, գտնվում են կառավարության հաշվեկշռում, և մի շարք եկեղեցիներ անհատույց օգտագործման են տված Հայաստանյայց Առաքելական Սուրբ եկեղեցուն։ Կարծում եմ՝ այնտեղ, որտեղ չկա հոգևոր կյանք, այլ կան ինտրիգներ, խարդավանքներ, ֆեյքերեցներ, բոլոր այդ հուշարձանները կվերադարձնենք հանրությանը»,- հայտարարել է Փաշինյանը։
Այս համատեքստում նա իր աջակցությունն է հայտնել Ասատրյանին, որն ավելի վաղ գրառումներ էր արել եկեղեցու խնդիրների մասին։
«Տեր Արամին և նրա նման քահանաներին բոլոր ձևերով կաջակցենք, որ նրանք Հայաստանում վերականգնեն իրական հոգևոր կյանքը։ Իրադարձությունները, որոնց ես հետևում էի, եկան համոզելու ինձ, որ Հովհաննավանքն այն տեղն է, որտեղ կարելի է ապրել հոգևոր կյանքով»,- հավելել է նա։
Թեպետ կարգալույծ լինելուն՝ Ասատրյանը հոկտեմբերի 21-ին հայտարարել էր, որ հոկտեմբերի 26-ին Հովաննավանքում պատրաստվում է պատարագ մատուցել։ Նույն օրը Փաշինյանը տեղեկցրել էր, որ մասնակցելու է պատարագին։ ԱԺ-ում այսօր նա վերահաստատել է դիրքորոշումը՝ նշելով, որ ոչ թե Ասատրյանն, այլ Գարեգին Բ-ն է «կարգալույծ»։
«Կտրիճ Ներսիսյանը (կաթողիկոս Գարեգին Երկրորդ- խմբ․) վաղուց կարգալույծ է, չի կարող կարգալույծ անել։ Նա ինչպե՞ս կարող է որևէ քահանայի կարգալույծ անել, եթե ունի կին և երեխաներ։ Կտրիճ Ներսիսյանը վաղուց կարգալույծ է, ինքը հոգևոր դասի մեջ չէ, ընդամենը մարդ է, որը մի խումբ իր նման կարգալույծ խմբակի հետ բռնազավթել է Մայր Աթոռը։ Ես Տեր Արամի ձեռքից հաղորդություն կընդունեմ, որովհետև եթե կարգալույծը նրան կարգալույծ է արել, դա նրա՝ քահանա օծված լինելու ապացույցն է»,- նշել է Փաշինյանը։
Հոգևորականների ձերբակալությունների երկրորդ ալիքն սկսվել էր Ասատրյանի՝ եկեղեցու ներսում առկա խնդիրների, այնուհետ «ընդդիմության 2021-ի ցույցերին ստիպողաբար մասնակցելու» հայտարարությունից հետո, որի վերաբերյալ քրեական վարույթ էր նախաձեռնվել։
Մինչդեռ Արագածոտնի թեմը քահանային կարգապահական նկատողություն էր հայտարարել, սեպտեմբերի 17-ին՝ կեղծ որակել նրա հնչեցրած հայտարարությունները։ Փաշինյանը հայտարարել էր, որ պատրաստ է կանգնել Ասատրյանի և եկեղեցու խնդիրները վեր հանող հոգևորականների թիկունքին։
Հոկտեմբերի 15-ին Ասատրյանի՝ «ցույցերին ստիպողաբար մասնակցելու» հայտարարության քրվարույթի շրջանակում Արագածոտնի թեմի առաջնորդարանում և հոգևորականների տան խուզարկություններից հետո բերման էր ենթարկվել 12 հոգևորական։ Կալանավորվել էին թեմի առաջնորդ Մկրտիչ եպիսկոպոս Պռոշյանը և Մուղնիի Սուրբ Գևորգ եկեղեցու հոգևոր հովիվ Գարեգին քահանա Արսենյանը, թեմի հաշվապահի նկատմամբ տնային կալանք էր կիրառվել։ Ասատրյանը հոկտեմբերի 21-ին կարգալույծ էր հռչակվել։
Կարդացեք նաև՝
«Չուլանացված» եկեղեցիներից մինչև կաթողիկոսի փոփոխության կոչ․ ի՞նչ օրակարգ է փորձում պարտադրել Փաշինյանը
Ինչո՞ւ են Սամվել Կարապետյանին կալանավորել. եկեղեցի, քաղաքականություն, ներդրումային ռիսկեր
