Սամվել Կարապետյանի փաստաբանները վճռաբեկ բողոքներ են ներկայացրել

«Տաշիր» ընկերությունների խմբի նախագահ Սամվել Կարապետյանի փաստաբանները վճռաբեկ բողոքներ են ներկայացրել, հայտարարել է գործարարի փաստաբանական խումբը։

Նշվում է, որ բողոքների արդյունքների վերաբերյալ լրացուցիչ իրազեկում կտրամադրվի:

Միևնույն ժամանակ՝ փաստաբանները հայտնել են, որ օգոստոսի 15-ից՝ գործարարի կալանքի երկարաձգման օրվանից մինչ այս պահը, ընդհանրապես որևէ քննչական, վարութային գործողություն չի կատարվել։

«Կարապետյանի նկատմամբ հետապնդումը որևէ աղերս չունի իրավունքի և օրինականության հետ, նվազագույն օրենսդրական երաշխիքները պահպանված չեն, և դասական իմաստով՝ քաղաքական հետապնդում է, որի վերաբերյալ տվյալներն անվիճելի են»,- եզրափակել են փաստաբանները։

Հունիսին «Տաշիր» խմբի նախագահն աջակցել էր Հայ Առաքելական եկեղեցուն՝ հոգևորականների հասցեին իշխանությունների քննադատությունների ֆոնին։ Հունիսի 18-ին գործարարը երկու ամսով կալանավորվել էր՝ իբր իշխանությունը զավթելու կոչի մեղադրանքով:

Հուլիսի 4-ին Կարապետյանը հայտարարել էր, որ վարչապետ Նիկոլ Փաշինյանը և նրա կառավարությունն «անելիք չունեն Հայաստանում»։ Հուլիսի 14-ին գործարարը հայտնել էր նոր քաղաքական թիմի ձևավորման մեկնարկի մասին։ Օգոստոսի 15-ին դատարանը 2 ամսով երկարաձգել էր Կարապետյանի կալանքը, սեպտեմբերի 8-ին մերժել էր գործարարի խափանման միջոցը փոխելու միջնորդությունը։

Օգոստոսի 29-ին Երևանում տեղի էր ունեցել Կարապետյանի «Մեր ձևով» շարժման շնորհանդեսը։ Շարժումը, որն աշխատել է 5 ուղղությամբ, ծրագրային աշխատանքները կավարտի 4-5 ամսվա ընթացքում, որից հետո քաղաքական հայտ կներկայացնի։

Կարդացեք նաև՝