«Տաշիր» ընկերությունների խմբի նախագահ, բարերար Սամվել Կարապետյանը կշարունակի մնալ կալանքի տակ․ դատարանը չի բավարարել պաշտպանների բողոքը, Armenia Today-ին հայտնեցին փաստաբան Արամ Վարդևանյանը և Արմեն Ֆերոյանը։
Ֆերոյանն Armenia Today-ին տեղեկացրեց, որ որոշումը ենթակա է բողոքարկման, իրենք օգտվելու են Վերաքննիչ դատարան դիմելու հնարավորությունից։ Վարդևանյանի խոսքով՝ պաշտպանական թիմի հետագա քայլերի մասին հանդես կգան առանձին հայտարարությամբ։
«Մենք օրենքի, իրավունքի գերակայության վերաբերյալ դիսկուրսը պարզապես դադարեցնում ենք, այդպես է ստացվում։ Սրանով չենք ստանում արդարադատություն, չենք ստանում արդար դատաքննության իրացում։ Թեև այսօր մեզ գրավոր որոշում չտրամադրվեց, կտրամադրվի վաղը, սակայն նույնիսկ առանց բովանդակային քննարկման մեջ մտելու ես իմ պնդումը հաստատապես կարող եմ կատարել»,- նշեց Վարդևանյանը։
Ավելի ուշ Կարապետյանի պաշտպանության խորհուրդը հայտարարեց՝ դատարանի այսօրվա որոշումը հաստատում է, որ դատական և իրավապահ համակարգերը քաղաքական հետապնդման գործիք են։ Խորհրդի կարծիքով՝ դատարանի որոշումը Հայաստանին զրկում է իրավական և ժողովրդավարական պետության կարգավիճակից, ինչպես նաև «կոչված է բավարարել փոքրիկ խմբակի ղեկավարի քմահաճույքները, ցավալիորեն զրկում է մեր երկիրը իրավական և ժողովրդավար պետության կարգավիճակից»։ Պաշտպանությունը շեշտել է, որ շարունակելու է հետևողականորեն պայքարել արդարադատության համար։
Հունիսին «Տաշիր» խմբի նախագահն աջակցել էր Հայ Առաքելական եկեղեցուն՝ հոգևորականների հասցեին իշխանությունների քննադատությունների ֆոնին։ Հունիսի 18-ին գործարարը երկու ամսով կալանավորվել էր՝ իբր իշխանությունը զավթելու կոչի մեղադրանքով:
Հուլիսի 4-ին Կարապետյանը հայտարարել էր, որ վարչապետ Նիկոլ Փաշինյանը և նրա կառավարությունն «անելիք չունեն Հայաստանում»։ Հուլիսի 14-ին գործարարը հայտնել էր նոր քաղաքական թիմի ձևավորման մեկնարկի մասին։ Օգոստոսի 15-ին դատարանը 2 ամսով երկարաձգել էր Կարապետյանի կալանքը։
Օգոստոսի 29-ին Երևանում տեղի էր ունեցել Կարապետյանի «Մեր ձևով» շարժման շնորհանդեսը։ Շարժումը, որն աշխատել է 5 ուղղությամբ, ծրագրային աշխատանքները կավարտի 4-5 ամսվա ընթացքում, որից հետո քաղաքական հայտ կներկայացնի։
