Ռուսաստանում հայտեր են գեներացվում ՌԴ-ից որոշակի ապրանքախմբերի՝ Ադրբեջանի տարածքով՝ երկաթուղու միջոցով, Հայաստան արտահանելու վերաբերյալ, լրագրողներին հայտնել է ՀՀ վարչապետ Նիկոլ Փաշինյանը։
Նա նշել է, որ Ադրբեջանով Հայաստան ապրանքներ արտահանելու հոսքերն սկսել են վերադասավորվել։
«Ի սկզբանե նախատեսված էր, որ Ղազախստանից պետք է առաջին գնացքը գա, բայց հետո պարզվեց, որ Ադրբեջանը նման հնարավորություն տալիս է նաև Ռուսաստանից եկող գնացքներին»,- ընդգծել է նա։
Միևնույն ժամանակ՝ Փաշինյանը տեղեկացրել է, որ Ղազախստանի՝ ի սկզբանե նախատեսված շարժակազմը դեռ տեղ չի հասել: Նա չի բացառել, որ նոր շարժակազմեր նույնպես կարող են լինել՝ շեշտելով, որ իրավիճակն անընդհատ փոխվում է։
«Հիմա պետք է նաև գործնականում պարզվի, թե արդյոք հակառակ ուղղությամբ ապրանքներն ինչպե՞ս են հոսելու, այսինքն՝ Հայաստանից Վրաստանով, Ադրբեջանով դեպի Ռուսաստան, Ղազախստան կամ այլ երկրներ»,- հավելել է նա։
Փաշինյանը ողջունել է Ռուսաստանի ակտիվ ներգրավվածությունը երկաթուղային տրանսպորտի հարցում։ Նա նշել է, որ օգոստոսի 8-ից հետո հնչում էին գնահատականներ, թե Իրանի և Ռուսաստանի համար սա բացասական իրադարձություն է, ինչին իշխանությունը հակադարձում էր։
«Ասում էինք՝ ոչ։ Այդ որոշումը նպաստելու է Հայաստան-Ռուսաստան հարաբերությունների զարգացմանը և խորացմանը։ Մենք արդեն ունենք զարգացումներ՝ 130 վագոն բեռ»,- շեշտել է նա։
Վարչապետը վերահաստատել է՝ ՀՀ իշխանությունը պատրաստ է Մարգարա-Կոռնիձոր և հակառակ երթուղով ապահովել ադրբեջանական և թուրքական բեռնատարների անցումը Թուրքիայից Ադրբեջան և հակառակ ուղղությամբ:
Հոկտեմբերի 21-ին Ադրբեջանի նախագահ Իլհամ Ալիևը հայտարարել էր Ադրբեջանի տարածքով դեպի Հայաստան ղազախական ցորեն փոխադրելու որոշման մասին, ինչը ողջունել էր Փաշինյանը։ Ավելի ուշ Ադրբեջանը հաստատել էր իր տարածքով ռուսական արտադրանքի տարանցումը Հայաստան։ Նոյեմբերի 6-ին ռուսական ցորենով բեռնված գնացքը ժամանել էր Հայաստան՝ անցնելով Ադրբեջանի և Վրաստանի տարածքով։
