Հայաստանը հենց այսօրվանից պատրաստ է իր տարածքով ապահովել բեռնատար ավտոմեքենաների տարանցումը Թուրքիայից դեպի Ադրբեջան և հակառակ ուղղությամբ, Թբիլիսիում «Մետաքսի ճանապարհ» 5-րդ համաժողովին հայտարարել է ՀՀ վարչապետ Փաշինյանը:
«Թուրքիայի հետ Հայաստանի ծավալած դրական երկխոսությունը հույս է տալիս, որ առաջիկայում կարող ենք նաև Հայաստան-Թուրքիա սահմանի բացում ունենալ»,- ասել է Փաշինյանը։
Նրա խոսքով՝ դրա համար քաղաքական պատրաստակամություն կա, Հայաստանը պատրաստ է նաև տեխնիկական առումով։ Նա հիշատակել է Մարգարա-Եղեգնաձոր-Սիսիան-Գորիս երթուղին՝ նշելով, որ Հայաստանի տարածքում թե՛ ճանապարհները, թե՛ ճանապարհային ենթակառուցվածքները պատրաստ են:
Փաշինյանը նաև կարևորել է Ադրբեջանի նախագահ Իլհամ Ալիևի հոկտեմբերի 21-ի հայտարարությունը՝ Ադրբեջանի տարածքով Հայաստան բեռների տարանցման սահմանափակումների չեղարկման մասին։
«Ուզում եմ իմ գնահատականն արտահայտել Ադրբեջանի նախագահի այս քայլի առիթով և ողջունել այդ հայտարարությունը: Տեղի է ունենում ամիսներ առաջ անհավանական թվացող մի բան՝ Ղազախստանից Ադրբեջանով և Վրաստանով Հայաստան է ներմուծվում հացահատիկ։ Այս գործարքի համար ուզում եմ գնահատանքիս խոսքերն ուղղել նաև Ղազախստանի նախագահ Կասիմ-Ժոմարտ Տոկաևին և Վրաստանի վարչապետ Իրակլի Կոբախիձեին»,- նշել է Փաշինյանը։
Վարչապետը հավելել է, որ քաղաքական առումով ՀՀ-ն պատրաստ է ճանապարհ ապահովել Նախիջևանից դեպի Ադրբեջան և հակառակ ուղղությամբ, սակայն դեռևս տեխնիկապես ենթակառուցվածքները պատրաստ չեն։ Նրա խոսքով՝ այս ամենը կյանքի կոչելու կարևոր պայմանը Հայաստանի և Ադրբեջանի միջև խաղաղությունն է՝ հաստատված օգոստոսի 8-ին Վաշինգտոնում:
Թբիլիսիում համաժողովին մասնակցող Ադրբեջանի վարչապետ Ալի Ասադովը հայտնել է, որ երկու երկրների միջև խաղաղության համաձայնագիրը պատրաստ է, մնում են որոշ նրբություններ, սակայն դրա ստորագրման կոնկրետ ժամկետ նա չի նշել:
Օգոստոսի 8-ին Վաշինգտոնում Հայաստանի և Ադրբեջանի ղեկավարներն ԱՄՆ-ի միջնորդությամբ հռչակագիր էին ստորագրել, որով նաև նախատեսվում է ստեղծել TRIPP («Միջազգային խաղաղության և բարգավաճման համար Թրամփի երթուղի»-խմբ.) տրանսպորտային երթուղի: Կողմերը նաև նախաստորագրել էին խաղաղության համաձայնագրի նախագիծ, որն օգոստոսի 11-ին հրապարակվել էր ՀՀ ԱԳՆ-ի կողմից: Փաստաթղթի համաձայն՝ կողմերը միմյանց նկատմամբ տարածքային պահանջներ չունեն և հետագայում նման պահանջներ չեն առաջադրելու:
