Ադրբեջանի նախագահ Իլհամ Ալիևը հայտարարել է Ադրբեջանի տարածքով Հայաստան ապրանքների տարանցման սահմանափակումների չեղարկման մասին։ Ադրբեջանական լրատվամիջոցների փոխանցմամբ՝ նա այս մասին հայտարարել է Ադրբեջանի և Ղազախստանի Բարձրագույն միջպետական խորհրդի նիստում։
«Առաջին նման տարանցիկ բեռը ղազախական ցորենի Հայաստան տեղափոխումն էր»,- Ալիևի խոսքերն են մեջբերել տեղական լրատվամիջոցները։
Ադրբեջանի նախագահը նաև հայտարարել է, որ Վաշինգտոնում ստորագրված համաձայնագիրը «բացում է զարգացման հեռանկարներ, այդ թվում՝ լայն տարածաշրջանային համատեքստում, Եվրասիական մայրցամաքում»։
«Խաղաղության համաձայնագրի նախաստորագրումը ցույց է տալիս, որ երկու երկրներն էլ ցուցաբերել են քաղաքական կամքի զգալի մակարդակ։ Եվ, իհարկե, ԱՄՆ նախագահ Դոնալդ Թրամփի դերն Ադրբեջանի և Հայաստանի միջև հարաբերությունների կարգավորման գործում արժանի է ամենաբարձր գովասանքի։ Վաշինգտոնում տեղի ունեցած գագաթնաժողովը, ըստ էության, վերջ դրեց երկարատև հակամարտությանը և մեծ հեռանկարներ բացեց Եվրասիական մայրցամաքում զարգացման համար, այդ թվում՝ ավելի լայն տարածաշրջանային համատեքստում»,- նշել է նա։
Ալիևը հավելել է, որ TRIPP նախագիծն անպայման կիրականացվի։ Նրա խոսքով՝ «Զանգեզուրի միջանցքի» բացումը կարող է տեղի ունենալ 2028 թվականի վերջին:
«Ադրբեջանի տարածքում ավտոմոբիլային և երկաթուղային հաղորդակցության հետ կապված աշխատանքները կավարտվեն հաջորդ տարվա կեսին»,- նշել է նա։
ՀՀ վարչապետի Նիկոլ Փաշինյանի մամուլի քարտուղար Նազելի Բաղդասարյանը հայտնել է, որ Հայաստանը ողջունում է Ադրբեջանի նախագահի հայտարարությունը՝ դեպի Հայաստան բեռների տարանցման սահմանափակումների վերացման մասին։
«Այս քայլը կարևոր նշանակություն ունի տարածաշրջանային հաղորդակցությունների բացման, փոխվստահության ամրապնդման և Հայաստանի ու Ադրբեջանի միջև հաստատված խաղաղության ինստիտուցիոնալացման գործում՝ Վաշինգտոնում ձեռք բերված պայմանավորվածություններին համահունչ»,- գրել է Բաղդասարյանը։
Օգոստոսի 8-ին Վաշինգտոնում Հայաստանի և Ադրբեջանի ղեկավարներն ԱՄՆ-ի միջնորդությամբ հռչակագիր էին ստորագրել, որով նաև նախատեսվում է ստեղծել TRIPP տրանսպորտային երթուղի: Կողմերը նաև նախաստորագրել էին խաղաղության համաձայնագրի նախագիծ, որն օգոստոսի 11-ին հրապարակվել էր ՀՀ ԱԳՆ-ի կողմից: Փաստաթղթի համաձայն՝ կողմերը միմյանց նկատմամբ տարածքային պահանջներ չունեն և հետագայում նման պահանջներ չեն առաջադրելու:
