Երևանն ու Թբիլիսին պայմանավորվել են հայկական կոնյակով բեռնատարների հատման և կոնյակի հետագա արտահանման պայմանների մասին, հայտնել է Հայաստանի էկոնոմիկայի նախարար Գևորգ Պապոյանը՝ Վրաստան կատարած այցի արդյունքներով:
Նրա խոսքով՝ պայմանավորվածություն է ձեռք բերվել Գեզի մաքսային տերմինալից այսօր բաց թողնել հայկական կոնյակով բեռնված 55 բեռնատար ավտոմեքենա, ևս 72-ը բաց կթողնվեն առաջիկա յոթ օրվա ընթացքում, իսկ դրան կհաջորդի լրացուցիչ 24 մեքենայի բացթողում։
Ձեռք է բերվել նաև պայմանավորվածություն այսուհետ հայկական շշալցված կոնյակի (հայկական բրենդիի) արտահանման գործընթացի կազմակերպման վերաբերյալ՝ փոխադարձ ընդունելի և կանխատեսելի պայմաններով։
Նշվում է, որ հայկական կողմից կապահովի շշալցված կոնյակով բեռնված մեքենաների անխոչընդոտ տրանզիտային ելքը դեպի Վրաստան։
Նախարարը և ՀՀ ՊԵԿ նախագահ Էդուարդ Հակոբյանը գործուղվել էին Թբիլիսի՝ հանդիպելու Վրաստանի առաջին փոխվարչապետ, Էկոնոմիկայի և կայուն զարգացման նախարար Լևան Դավիթաշվիլիի, Գյուղատնտեսության և շրջակա միջավայրի նախարար Դավիթ Սոնգուլաշվիլիի, ինչպես նաև Պետական եկամուտների ծառայության ղեկավար Իրակլի Բերաիայի հետ։
Ապրիլի կեսից Ռուսաստան և Բալթյան երկրներ արտահանման համար նախատեսված հայկական կոնյակով և այլ ալկոհոլային խմիչքներով բեռնատարները երկարատև ստուգումներ են անցնում տարանցիկ երկրում և մնում վրացական անցակետերում: Մայիսի 13-ին և մայիսի 21-ին Հայաստանից կոնյակ արտահանողները բողոքի ակցիաներ էին իրականացրել ՀՀ-ում Վրաստանի դեսպանատան շենքի առջև՝ պահանջելով լուծում տալ իրենց ապրանքի արտահանման ժամանակ առաջացած խնդիրներին։
Հունիսի 18-ի ԱԺ-կառավարություն հարցուպատասխանի ժամանակ Պապոյանը հայտարարել էր՝ վրացական կողմը որոշակի կասկածներ էր հայտնել, որ այդ մեքենաների կոնյակի մի մասը կոնյակ չէ, և պետք է որոշակի փորձաքննություն իրականացնել։ Հունիսի 19-ին ՊԵԿ-ը հայտնել էր, որ հայ-վրացական սահմանին հայկական շշալցված կոնյակով բեռնված բեռնատարների կուտակման հետ կապված խնդիրը կարգավորվել է։
