Հայաստանի արտահանողները բողոքի ակցիա են իրականացրել Հայաստանում Վրաստանի դեսպանատան շենքի առջև՝ պահանջելով լուծում տալ խնդիրներին, որոնց բախվել են իրենց ապրանքի արտահանման ժամանակ: Նրանք պնդում են, որ տևական ժամանակ է՝ ալկոհոլային խմիչք արտադրող և արտահանող ընկերությունների ՌԴ մեկնող բեռնատարներն արգելափակված են Վրաստանի մաքսային տարածքում։ Ակցիայի մասնակիցների խոսքով՝ իրենց մեքենաներից հանվել են մաքսային կնիքներն ու անհասկանալի պատճառներով նմուշառումներ են իրականացվել փորձաքննության համար։
Արտահանողները նշել են, որ Վրաստանը տարանցիկ երկիր է, ու իրենց համար անհասկանալի է, թե ինչո՞ւ են այնտեղ լաբորատոր ստուգումներ իրականացվում։ Նրանք պահանջել են հանդիպում դեսպանի հետ, որպեսզի պարզաբանում ստանան իրավիճակի առնչությամբ:
«Շահնազարյան գինու և կոնյակի Տուն» ընկերության տնօրեն Հայկ Շահնազարյանի խոսքով՝ նախկինում երբեք չեն առնչվել նման խնդրի հետ, բիզնեսն ամեն օր վնաս է կրում:
«Մենք չենք հասկանում, ինչպե՞ս կարելի է տարանցիկ բեռի մաքսային պլոմբաները պոկել, ինչ-որ նմուշառում անել ու պահել ամսից ավել։ Եկել ենք՝ դեսպանից պատասխան ստանանք։ Ֆինանսական կորուստն այսպես չես կարող հաշվարկել։ Օրական հարյուր դոլար ամեն կանգնած մեքենայի համար վճարում ենք, բայց երբ բեռը հասցեատիրոջը չի հասնում, մեր ռուս գործընկերները որոշ ժամանակ հետո կարող են հրաժարվել համագործակցությունից, մեզ կարող են փոխարինել այլ արտադրողով՝ հայկական կամ ոչ հայկական։ Այդ ժամանակ մեր կորուստներն ահռելի կլինեն»,- հայտարարել է նա։
Պռոշյանի կոնյակի գործարանի ներկայացուցիչը հայտարարել է, որ իրենց ապրանքը երբեք որակի հետ խնդիրներ չի ունեցել:
«Անհայտ պատճառով փակել են ճանապարհները։ Չգիտենք՝ պատճառն ինչ է։ Մենք երբեք խնդիր չենք ունեցել որակի հետ կապված։ Այժմ մեքենաների քանակից տեղյակ չեմ, սակայն շատ են։ Փորձաքննության պատասխանները երկարացնում են, պահել են անալիզի, բայց պատասխան չեն տալիս։ Մեր իշխանություններին պահանջ չենք ներկայացրել, նոր միայն դիմել ենք Վրաստանի դեսպանատանը»,- ասել է նա։
Նույն գործարանի 20 տարվա աշխատակից Վերգինե Հովհաննիսյանը նշել է, որ այժմ աշխատում են միայն ներքին սպառման արտադրանքի վրա, ինչը կարող է հանգեցնել գործազրկության։
«Երբևէ ոչ մի խնդրի առաջ չենք կանգնել։ Ամեն ինչ նորմալ ընթացել է։ Կուզեինք նաև կառավարության միջամտությունը, որպեսզի այսքան ժողովուրդը գործազուրկ չմնա։ Հուսով ենք՝ մեր խնդրանքը տեղ կհասնի։ Այստեղ յուրաքանչյուրն ունի ընտանիք, ապրում են վարձով, ունեն խնդիրներ»,- նշել է նա։
Ավելի ուշ բողոքի ակցիայի երկու մասնակից մուտք է գործել դեսպանատան շենք՝ դեսպան Գիորգի Շարվաշիձեի հետ հանդիպման։ Հանդիպումից հետո Պռոշյանի գինու գործարանի արտահանման մասնագետ Գայանե Պողոսյանը պատմել է, որ իրենց խոստացել են՝ Վրաստանը պաշտոնական հայտարարությամբ հանդես կգա հարցի լուծմանն ու բացատրությանն ուղղված բովանդակությամբ։
«Կոնկրետ ժամկետներ չեն նշել, 10 րոպեից մինչև 2 օրվա ընթացքում։ Իրենք տեղյակ չեն, դիմել են պաշտոնական Թբիլիսիին, ակնկալում են պատասխան։ Մեզ ասացին, որ այսօր են տեղեկացել խնդրի մասին, մեզնից մանրամասն ինֆորմացիա էին ակնկալում, մենք մաքսիմալ փորձեցինք հակիրճ ներկայացնել ստեղծված իրավիճակը։ Ենթադրում եմ, որ գուցե տեղյակ էին, բայց այնքան խորքային չէ»,- պարզաբանել է նա։
Շահնազարյանն, իր հերթին, մանրամասներ է ներկայացրել դեսպանի հետ հանդիպումից։
«Դեսպանի խոսքով՝ Վրաստանից իրեն ասել են, որ իրավունք ունեն մեքենաները բացել, նմուշ վերցնել և ուղարկել անալիզի։ Ոչ մի իրավական հիմք չեն նշել, մեր մեքենաները բացվել են, մենք ոչ մի թուղթ կամ ակտ չունենք։ Խոսք ենք տվել սպասել մոտակա 1-2 օրը։ Եթե հարցը չլուծվի, ակցիաները կշարունակվեն։ Դիմել ենք Էկոնոմիկայի նախարարություն, նախարարն ու իր տեղակալն ասել են, որ զբաղվում են խնդրով»,- պատմել է Շահնազարյանը։
Էկոնոմիկայի նախարար Գևորգ Պապոյանը, ԱԺ-ում պատասխանելով ընդդիմադիր պատգամավոր Գառնիկ Դանիելյանի հարցին, թե ի՞նչ է անում նախարարությունը խնդրին լուծում տալու համար, ասել էր, որ Վրաստանի հետ քննարկում են տարբեր իրավիճակներում սցենարներ։
«Իհարկե, գործարար համայնքը նույնպես իր կապերով նույն քննարկումների մեջ է։ Առաջիկայում հնարավոր է ևս մեկ անգամ արդեն ես մեկնեմ Վրաստան, տեղում ևս մեկ անգամ քննարկենք, որովհետև ի տարբերություն մյուս ապրանքների, որոնց հարցը մենք լուծել ենք, կոնյակի սպիրտի հարցը շարունակում է չկարգավորված մնալ, իրապես կա, ու ես կարծում եմ, որ մեր տնտեսվարողներն այստեղ ճիշտ են»,- պարզաբանել էր նա։
