Վրացական կողմը երեկ՝ հունիսի 17-ին, խոստացել էր հայկական կոնյակով բեռնված 50 մեքենայի թույլատրել հատել սահմանը, և մեկ ժամ առաջվա դրությամբ՝ 33 բեռնատար հասել է Լարսի անցակետ, ԱԺ-կառավարություն հարցուպատասխանի ժամանակ հայտարարել է ՀՀ էկոնոմիկայի նախարար Գևորգ Պապոյանը։
Ըստ նրա՝ մեքենաները բաց թողնելու ընթացքը շարունակվում է, նախարարությունը համատեղ աշխատում է վրացական կողմի հետ՝ նրանց առաջարկած մեխանիզմով արտահանումը կազմակերպելու համար։
«Ինչ-որ պահից վրացական կողմը փորձաքննություն իրականացնելու պատճառաբանությամբ կանգնեցրեց հայկական բեռնատարները, որոնք տեղափոխում են հայկական բրենդի շշալցված կոնյակ, և այդ պահից մենք ակտիվ աշխատանք ենք իրականացրել։ Ինչ-որ փուլում՝ որոշակի համագործակցության արդյունքում, 61 մեքենա ստացվեց տեղափոխել, և դրանք ՌԴ տարածքում են՝ այն վերջնակետում, ուր պետք է գնային»,- նշել է նա։
Պապոյանի խոսքով՝ վրացական կողմը որոշակի կասկածներ է հայտնել, որ այդ մեքենաների կոնյակի մի մասը կոնյակ չէ, և պետք է որոշակի փորձաքննություն իրականացնել։
«Ըստ էության՝ այդպիսի իրավունք ունի այն երկիրը, որը ստանում է այդ ապրանքը։ Փոխադրող, տրանզիտ երկրներն այդպիսի իրավունք չունեն և դրա մասին տեղեկացրել ենք մեր գործընկերներին»,- պարզաբանել է նա։
Պապոյանի խոսքով՝ հայկական կողմն ինքն է առաջարկել, որ եթե որևէ մեքենայի հետ կապված կա կասկած, ապա համատեղ վերցնեն նմուշ, ուղարկեն որևէ եվրոպական լաբորատորիա, այնտեղ փորձաքննություն իրականացվի։
«Մենք հիմա ակտիվ աշխատում ենք նաև ՀՀ-ում այդպիսի լաբորատոր կարողություն ձևավորելու ուղղությամբ։ Բոլոր սարքավորումները գնված են, ՍԱՏՄ աշխատակիցները թրեյնինգի փուլում են»,- տեղեկացրել է նախարարը։
Ապրիլի կեսից Ռուսաստան և Բալթյան երկրներ արտահանման համար նախատեսված հայկական կոնյակով և այլ ալկոհոլային խմիչքներով բեռնատարները երկարատև ստուգումներ են անցնում տարանցիկ երկրում և մնում վրացական անցակետերում: Մայիսի 13-ին և մայիսի 21-ին Հայաստանից կոնյակ արտահանողները բողոքի ակցիաներ էին իրականացրել ՀՀ-ում Վրաստանի դեսպանատան շենքի առջև՝ պահանջելով լուծում տալ իրենց ապրանքի արտահանման ժամանակ առաջացած խնդիրներին։
Հունիսի 4-ին ՀՀ էկոնոմիկայի նախարար Գևորգ Պապոյանը հայտնել էր Վրաստանի շրջակա միջավայրի պաշտպանության և գյուղատնտեսության նախարար Դավիթ Սոնգուլաշվիլիի Հայաստան այցի մասին՝ իրավիճակը քննարկելու համար: Հունիսի 7-ին վրացի նախարարի այցը չեղարկվել էր։
