Հայաստանը ներկայացնող Մանվել Խնձրցյանը (57 կգ) և Վազգեն Թևանյանը (65 կգ) դարձել են ազատ ոճի ըմբշամարտի Եվրոպայի առաջնության բրոնզե մեդալակիրներ, հայտնում է Հայաստանի ըմբշամարտի ֆեդերացիան։
Խնձրցյանը սերբ Ազամատ Տուսկաևի հետ մենամարտում 6։1 հաշվով պարտվելով՝ կարողացել է հավասարեցնել հաշիվը և, ի վերջո, 18։6 հաշվով հաղթել։
Թևանյանը 7։0 հաշվով հաղթել է Ադրբեջանի ներկայացուցչին Ռաշիդ Բաբազադեին:
Հայաստանը ներկայացնող հունահռոմեական ոճի ըմբիշ Մալխաս Ամոյանը Եվրոպայի հնգակի չեմպիոն էր հռչակվել։ Սուրեն Աղաջանյանը (60 կգ) դարձել էր արծաթե մեդալակիր։ Բրոնզե մեդալներ էին նվաճել Կարեն Ասլանյանը (63 կգ), Սլավիկ Գալստյանը (67 կգ) և 72 կգ քաշային կարգում հանդես եկող Գասպար Տերտերյանը։
Ըմբշամարտի Եվրոպայի առաջնությունն անցկացվում է Տիրանայում՝ ապրիլի 20-26-ը: Մրցաշարի ծրագրում ներառված են հունահռոմեական, ազատ ոճի և կանանց ըմբշամարտի մրցումները։ Հայաստանը ներկայացնող մարզիկները հունահռոմեական ոճում ներկայացված են 10, իսկ ազատ ոճում՝ 8 քաշային կարգերում։
