Ծանրորդ Գարիկ Կարապետյանը հռչակվել է Եվրոպայի եռակի չեմպիոն, հայտնում է Հայաստանի ծանրամարտի ֆեդերացիան։
Վրաստանի Բաթումի քաղաքում ընթացող Եվրոպայի առաջնության տղամարդկանց 110 կգ քաշային ծանրորդների պայքարում Հայաստանն ուներ երկու մասնակից` Գարիկ Կարապետյանն ու Սիմոն Մարտիրոսյանը:
Կարապետյանը պոկում վարժության առաջին մոտեցմամբ բարձրացրել է 189 կգ։ Այս վարժությունում Կարապետյանը բրոնզե մեդալակիր է: Հրում վարժությունում Կարապետյանը բարձրացրել է 226 կգ: Այս ձևում նա առաջինն է: Երկամարտի 415 կգ արդյունքով` նա Եվրոպայի չեմպիոն է:
Մարտիրոսյանը պոկում վարժությունում գլխավերևում պահել է միայն 183 կգ: Հրում վարժությունում Մարտիրոսյանը բարձրացրել է 215 կգ: Երկամարտի 398 կգ արդյունքով` նա ԵԱ-ում 6-րդն է:
Առաջնության չեմպիոնի կոչմանն արժանացել էր նաև Էմմա Պողոսյանը (86 կգ)։ Արծաթե մեդալակիրներ էին դարձել Հայաստանը ներկայացնող Գառնիկ Չոլաքյանը, Ալեքսանդրա Գրիգորյանը, Գոռ Սահակյանը և Արա Աղանյանը։ Աննա Ամրոյանը փոքր ոսկե մեդալ էր նվաճել։
Առաջնությունն անցկացվում է ապրիլի 19-26-ը։
