Բաքվում նոյեմբերի 21-22-ը կլոր սեղան-քննարկմանը մասնակցած 5 հայ փորձագետին չի հաջողվել հանդիպել Ադրբեջանում պահվող հայ գերիների հետ, այդ մասին հայտնել են Բաքվից վերադարձած փորձագետները՝ Երևանում կայացած ասուլիսին։ Այն հեռարձակվել է Armenia Today-ի Youtube-ի ալիքում։
Փորձագետների խոսքով՝ գերիների հետ հանդիպելու իրենց առաջարկն Ադրբեջանում «պարկեշտ մերժել» են։ Նրանք հայտարարել են, որ Բաքվում Ադրբեջանի նախագահի օգնական Հիքմեթ Հաջիևի հետ հանդիպմանը հայ գերիների վերաբերյալ իրենց հստակ թիվ ու անուններ չեն հայտնել։
Երևանի մամուլի ակումբի նախագահ Բորիս Նավասարդյանը, որը նույնպես խմբի կազմում էր, նշել է, որ գերիներին տեսակցելը թեև իրենց համար առաջնահերթություն չէր, բայց այդ ցանկությունը նախքան մեկնելը Երևանում բարձրացրել էին։
«Եթե տեսակցությունը որպես ծրագրի մաս չի առաջարկվել, նշանակում է՝ մերժվել է։ Մեզ նախապես այցի օրակարգ էին առաջարկել, որոնց վերաբերյալ որոշ մեկնաբանություններ ենք ունեցել։ Քանի որ առաջարկի մեջ տեսակցությունը չկար, թեպետ այդ ցանկությունը հայտնել էինք, դա նշանակում է՝ պարկեշտ մերժում»,- ընդգծել է նա։
Նավասարդյանի խոսքով՝ իրենց համար կարևոր է, որ գերիների վերադարձի առումով առաջընթաց լինի։
«Վերադարձի հարցը բարձրացրել ենք ադրբեջանական կողմի հետ հանդիպմանը։ Հարցը քննարկվում է, այն, միգուցե, կստանա որոշակի լուծում, բայց ե՞րբ, ինչպիսի՞ լուծում կլինի, երևի կտեսնենք մոտակա ժամանակներում։ Կան որոշ մանրամասներ, բայց քանի որ դրանք վերջնական չեն, չէի ցանկանա խոսել դրանց մասին»,- նշել է Նավասարդյանը։
Փորձագետների փոխանցմամբ՝ ադրբեջանական կողմից իրենց հայտնել են, որ գերիների «հարցն ընթացքի մեջ է, բայց ո՛չ դրական, ո՛չ էլ բացասական պատասխան չեն ստացել»։
Բաքու մեկնած խմբի կազմից քաղաքագետ Արեգ Քոչինյանը նշել է, որ Հաջիևն իրենց խնդրել է Հայաստանի հասարակությանը մի քանի ուղերձ փոխանցել պատերազմի, ինչպես նաև հայ-ադրբեջանական կոնֆլիկտի մասին։
«Առաջինը պատերազմի ավարտված լինելու ուղերձն է, Ադրբեջանի համար այլևս պատերազմ չկա, երկրորդ, որ հայ-ադրբեջանական կոնֆլիկտն իրենց համար ավարտված է։ Իրենք ուզում են պատերազմ չլինելու պայմաններում խաղաղություն կառուցել։ Իրենք ցանկանում են Հայաստանի հետ երկարատև ու համապարփակ խաղաղություն կառուցել, նաև նշեցին, որ իրենց համար կարևոր է այս մեսիջները մեր միջոցով փոխանցել հայ հասարակությանը»,- հավելել է Քոչինյանը։
Նա տեղեկացրել է, որ հայ ու ադրբեջանցի փորձագետների փոխադարձ այցերը շարունակվելու են։
Կառավարությունը նոյեմբերի 20-ին հավանություն էր տվել նախագծին, որով Բաքվում քննարկման էին մասնակցելու 5 հայ փորձագետ։ Այն փոխադարձ այց էր․ Ադրբեջանի հասարակական կազմակերպությունների, փորձագիտական համայնքների ներկայացուցիչները Երևանում էին հոկտեմբերի 21-22-ը։ Հայաստան ժամանած ադրբեջանցի փորձագետների խմբում էր նաև Արցախի շրջափակմանը մասնակցած «էկոակտիվիստ» Դիլարա Էֆենդիևան։
