Ժողովուրդը չի հանդուրժելու եկեղեցու և ազգային ինքնության նկատմամբ հակաքարոզը․ Հայկ Իգնատյան

Հայ Առաքելական եկեղեցու (ՀԱԵ) հոգևոր խորհրդի անդամ, «Տաշիր» ընկերությունների խմբի առաջին փոխնախագահ Հայկ Իգնատյանը կիսվել է Հովհաննավանքի լուսանկարով ու քննադատել եկեղեցու նկատմամբ գործողությունները։

Հոկտեմբերի 26-ին Հովհաննավանքում կարգալույծ քահանա Ստեփան Ասատրյանը, այսպես կոչված, պատարագ էր մատուցել, որին մասնակցել էր ՀՀ վարչապետ Նիկոլ Փաշինյանը։

Իգնատյանը համոզված է՝ հայ ժողովուրդը եկեղեցու դեմ քարոզչությունը չի հանդուրժելու։

«Փոքրիկ խմբակի ղեկավարն իր վերջին ուժերը լարելով հերթական անգամ փորձում է ժողովրդին բաժանել սևերի և սպիտակների, սակայն դա նրան չի հաջողվելու: Ժողովուրդը չի հանդուրժելու եկեղեցու և իր ազգային ինքնության նկատմամբ հակաքարոզը»,- գրել է նա։

Հոգևորականների ձերբակալությունների երկրորդ ալիքն սկսվել էր Հովհաննավանքի արդեն նախկին քահանա Ասատրյանի՝ եկեղեցու ներսում առկա խնդիրների, այնուհետ «ընդդիմության 2021-ի ցույցերին ստիպողաբար մասնակցելու» հայտարարությունից հետո, որի վերաբերյալ քրեական վարույթ էր նախաձեռնվել։

Արագածոտնի թեմը քահանային կարգապահական նկատողություն էր հայտարարել, սեպտեմբերի 17-ին՝ կեղծ որակել նրա հնչեցրած հայտարարությունները։ Փաշինյանը հայտարարել էր, որ պատրաստ է կանգնել Ասատրյանի և եկեղեցու խնդիրները վեր հանող հոգևորականների թիկունքին։

Հոկտեմբերի 15-ին Ասատրյանի՝ «ցույցերին ստիպողաբար մասնակցելու» հայտարարության քրվարույթի շրջանակում Արագածոտնի թեմի առաջնորդարանում և հոգևորականների տան խուզարկություններից հետո բերման էր ենթարկվել 12 հոգևորական։ Կալանավորվել էր թեմի առաջնորդ Մկրտիչ եպիսկոպոս Պռոշյանը և Մուղնիի Սուրբ Գևորգ եկեղեցու հոգևոր հովիվ Գարեգին քահանա Արսենյանը, թեմի հաշվապահի նկատմամբ տնային կալանք էր կիրառվել։

Ասատրյանը հոկտեմբերի 21-ին կարգալույծ էր հռչակվել, բայց հրաժարվել էր ընդունել կարգավիճակը:

Կարդացեք նաև՝