Ամենայն Հայոց կաթողիկոս Գարեգին Երկրորդի կողմից կարգալույծ հռչակված քահանա, Հովհաննավանքի նախկին հոգևոր հովիվ Ստեփան Ասատրյանը հրաժարվում է դուրս գալ վանքից՝ պնդելով, թե ինքը դեռ քահանա է։ Նա հրաժարվել է նաև եկեղեցու բանալիները հանձնել Հայ Առաքելական եկեղեցու կողմից նշանակված վանահայրին՝ Տեր Մանուկին:
Հոկտեմբերի 23-ին վանքում հարսանիք է անցկացվել, իսկ դրսում եկեղեցականների ու հավաքվածների միջև վեճ է սկսվել։ Ասատրյանի աջակիցները նշել են, որ նա պետք է մնա եկեղեցում և շարունակի ծառայությունը, մինչդեռ Մայր Աթոռի դիվանատնից նախկին քահանային ծանուցագիր էին բերել՝ եկեղեցու տարածքը լքելու մասին։
Ասատրյանը հայտարարել է, որ իր համար ծանուցագիրը որևէ ուժ չունի։
Ծանուցագիրը բերողներից մեկը հիշեցրել է, որ քահանան բանալիները պետք է հանձներ մինչև ժամը 15:00-ն: Դիմելով Ասատրյանին՝ նա ասել է. «Դուք՝ որպես քահանա, այլևս չեք կարող լինել այնտեղ, որտեղ պատշաճ է քահանաներին լինելու, այսինքն՝ խորանի վրա, ատյանում, դասերում և ավանդատներում»։
Նախկին քահանան կրկին արձագանքել է, որ չի ընդունում այդ ծանուցումը և այն ուղարկող կառույցը:
Տաճարի բակում հավաքված քաղաքացիներն իրենց դժգոհություն են հայտնել Էջմիածնի որոշումից: Ներկաները վանկարկել են, թե այստեղ նշանակված հոգևոր հովիվ Տեր Մանուկն իրենց «պետք չէ»։
Ոստիկանությունը շրջափակել է տարածքը և լրագրողներին խնդրել լքել բակը։ Ագրեսիա դրսևորած և վիրավորանքներ բղավող քաղաքացիներին դուրս են բերել վանքի սահմաններից։
Ասատրյանը հրաժարվել է պատասխանել լրագրողների հարցերին՝ նշելով, որ մեկնաբանություններ տալու մտադրություն չունի: Նա ընդգծել է, որ Մայր Աթոռը պատերազմ է հայտարարում Աստծուն, ապա հավելել՝ ինքն իրեն համարում է Աստծո սպասավոր:
Երբ եկեղեցու նոր քահանան լքել է տարածքը, Ասատրյանը բղավել է վարչապետ Նիկոլ Փաշինյանի՝ հոկտեմբերի 22-ին ԱԺ-կառավարություն հարցուպատասխանին հնչեցրած խոսքերը:
«Կաթողիկոսը չի կարող կին ու երեխա ունենալ։ Նկարներն ունեմ, ապրելու տեղը ունեմ։ Կաթողիկոսը չի կարող ամուսնական կյանքով ապրել։ Կաթողիկոսն ամուսնացած է, երեխաներ ունի։ Կարգալույծ եղած կաթողիկոսը չի կարող ինձ կարգալույծ անել»,- ասել է նա։
Թեպետ կարգալույծ լինելուն՝ Ասատրյանը հոկտեմբերի 21-ին հայտարարել էր, որ հոկտեմբերի 26-ին Հովհաննավանքում պատրաստվում է պատարագ մատուցել։ Նույն օրը Փաշինյանը տեղեկացրել էր, որ մասնակցելու է պատարագին։ ԱԺ-ում էլ վերահաստատել էր դիրքորոշումը՝ նշելով, որ ոչ թե Ասատրյանն, այլ Գարեգին Բ-ն է «կարգալույծ»։
