ՀՀ կառավարությունը մինչև սեպտեմբերը ներառյալ երկարաձգել է 2020 թվականի աշնանը տեղի ունեցած մարտական գործողությունների հետևանքով անհետ կորած զինծառայողների ընտանիքների ամենամսյա սոցիալական աջակցության ծրագիրը։ Համապատասխան որոշումն ընդունվել է կառավարության հուլիսի 2-ի նիստում։
Գործող կարգի համաձայն՝ ամսական 300 000 դրամի չափով վճարումը նախատեսված էր մինչև հունիս։ Հուլիսի 1-ից աջակցությունից կարող էր զրկվել 20 ընտանիք, որոնց անհետ կորած հարազատների վերաբերյալ դատարանները դեռևս չեն կայացրել անհայտ բացակայող ճանաչելու մասին որոշումներ։
Այս կապակցությամբ կառավարությունն առաջարկում է վճարումները երկարաձգել ևս երեք ամսով՝ մինչև սեպտեմբերը՝ ներառյալ։
Իշխանությունների գնահատմամբ՝ հուլիս, օգոստոս և սեպտեմբեր ամիսների վճարումների համար կպահանջվի 18 միլիոն դրամ։ Ֆինանսավորումը նախատեսվում է ապահովել 2026 թվականի պետական բյուջեով Աշխատանքի և սոցիալական հարցերի նախարարության համար նախատեսված միջոցների վերաբաշխման հաշվին։
ՀՀ ազգային ժողովի Պաշտպանության և անվտանգության հարցերի մշտական հանձնաժողովի մարտի 2-ի նիստում ՀՀ արդարադատության նախարար Սրբուհի Գալյանը հայտարարել էր, որ նախատեսվում է ստեղծել անհայտ կորած անձանց միասնական ռեեստր, սահմանել անհայտ կորած անձի կարգավիճակը, ինչպես նաև ամրագրել նրանց և նրանց ընտանիքների անդամների իրավունքները:
Armenia Today-ին Քննչական կոմիտեից 2025-ի հոկտեմբերին հայտնել էին, որ 2020 թվականի 44-օրյա պատերազմի հետևանքով անհետ կորած է համարվում 191 մարդ՝ 172 զինծառայող և 19 քաղաքացիական անձ։
Մարտին անհայտ կորած զինծառայողների 21 ընտանիքի տրվող աջակցությունը երկարաձգվել էր, կառավարությունը 18,9 միլիոն դրամ էր հատկացրել այդ որոշման իրագործման համար։
