Արցախցիների իրավունքների պաշտպանության խորհուրդը հայտարարել է արցախցիների աջակցության ծրագրերի շարունակման և նրանց սոցիալ-տնտեսական խնդիրների լուծման երկարաժամկետ քաղաքականության մշակման, այդ թվում՝ բռնի տեղահանվածներին բնակարանով ապահովելու համար պայքարի նոր փուլի մասին։
Նշվում է, որ այդպիսի որոշման հիմք է հանդիսացել մարտի 29-ի հանրահավաքի ժամանակ հայտարարված մեկշաբաթյա ժամկետը, ինչպես նաև այս ընթացքում տեղի ունեցած զարգացումները։
Հայաստանի իշխանություններին ուղղված պահանջների թվում է արցախցիների վերադարձի իրավունքի ապահովումը, Բաքվում պահվող հայ գերիների ազատ արձակումը, ինչպես նաև արցախցիների մշակութային ժառանգության և ունեցվածքի պահպանության ապահովումը։
Նշվում է, որ մինչև ապրիլի 15-ը տեղի ունեցող հանրային լայն քննարկումների ու համախմբման արդյունքում կհայտարարեն հաջորդ մեծ հանրահավաքի օրն ու վայրը, որին կհաջորդեն կոնկրետ զանգվածային գործողություններ:
Խորհուրդը հայտնել է, որ ՀՀ կառավարությունը պատշաճ կերպով չի արձագանքել հանրահավաքի պահանջներին՝ արցախցիների ներկայացուցիչների հետ ունենալով խիստ սահմանափակ քննարկում: Բացի դրանից, կառավարությունը փոխանցել է գրավոր պատասխան՝ պահանջագրի 5 կետի վերաբերյալ որոշակի մեկնաբանություններ կատարելով։
«Դրանք չեն համապատասխանում մեր պատկերացումներին: Նրանց միակ գործնական առաջարկը փորձագիտական խմբերի ձևավորումն է՝ որոշակի լուծումներ մշակելու նպատակով»,- ասվում է հայտարարության մեջ:
Խորհուրդն արցախյան, հայաստանյան և Սփյուռքի բոլոր սրտացավ հասարակական ու քաղաքական ուժերին ու գործիչներին կոչ է արել համախմբվել իրենց ներկայացրած օրակարգի շուրջ և աջակցել համազգային պայքարին:
Խորհրդից հավելել են, որ տարբեր վայրերում ու կառույցների մոտ կազմակերպելու են բողոքի ու իրազեկման տեղային հավաքներ՝ ներկայացնելով պահանջներն ու դրանց առնչվող այլ դրույթներ:
«Մենք համարում ենք, որ ներկայացված պահանջներն ամբողջ հայ ժողովրդի օրակարգային հարցերն են և ակնկալում ենք բոլորի սատարումը՝ անկախ բնակության ու ծագման վայրից»,- շեշտվում է հաղորդագրության մեջ:
Ապրիլի 3-ին, ՀՀ փոխվարչապետ Տիգրան Խաչատրյանի հետ հանդիպումից հետո, արցախցիները հայտարարել էին, որ կշարունակեն պայքարը։
Մարտի 29-ին արցախցիները հանրահավաք էին անցկացրել «Ազատության» հրապարակում։ Բողոքի ակցիայի նպատակներից մեկը կառավարության այն որոշման չեղարկումն էր, որով ապրիլի 1-ից բնակվարձի փոխահատուցում (40+10) կստանան ոչ թե բոլոր արցախցիները, այլ բռնի տեղահանվածների առանձին խմբեր։ Նրանք կառավարությանն իրենց պահանջները կատարելու համար 1 շաբաթ ժամանակ էին տվել։
Արցախցիների իրավունքների պաշտպանության խորհրդի կողմից կազմակերպված հանրահավաքում ներկայացվել էր 12 կետից բաղկացած պահանջագիր՝ ուղղված ՀՀ իշխանություններին և միջազգային հանրությանը:
Արցախի ՄԻՊ Գեղամ Ստեփանյանի խոսքով՝ Լեռնային Ղարաբաղից բռնի տեղահանվածներին «40+10» աջակցության ծրագիրն ապրիլից միայն հատուկ խմբերի համար շարունակելու մասին Հայաստանի իշխանությունների որոշումը չի քննարկվել Արցախի կառավարության և խորհրդարանի ներկայացուցիչների հետ։
Կարդացեք նաև՝
«Մեկ տարի առանց Արցախի». 2023թ․ ադրբեջանական հարձակման և բնիկ հայերի տեղահանության ժամանակագրություն
Բարձր հարկեր և աջակցության բացակայություն. ի՞նչ դժվարություններ ունի արցախյան բիզնեսը Հայաստանում
