Ուժեղ և երկարատև խաղաղության միակ երաշխիքը ուժեղ Հայաստան ունենալն է, «Ուժեղ խաղաղություն» անվտանգության ծրագրի շնորհանդեսի ժամանակ հայտարարել է «Ուժեղ Հայաստան» կուսակցության խորհրդի անդամ Նարեկ Կարապետյանը։ Շնորհանդեսի ուղիղ հեռարձակումը՝ Armenia Today-ի Youtube-ի ալիքով։
Նրա խոսքով՝ հունիսին ՀՀ-ում կայանալիք ընտրություններից հետո, ըստ բոլոր անկախ հարցումների, «Ուժեղ Հայաստան» կուսակցության նախագահ Սամվել Կարապետյանն է ստանձնելու երկրի կառավարման պատասխանատվությունը։ Նա նշել է, որ այդ մասին են վկայում նաև քաղաքացիներից ստացած հազարավոր ազդակները։
Տնտեսական և անվտանգային ծրագրեր
«Մեծ աշխատանք ունենք կատարելու, վերականգնելու այն վնասը, որը վարչապետ Նիկոլ Փաշինյանը հասցրել է երկրի տնտեսությանն ու անվտանգությանը։ Նախորդ 3 ամիսներին անդադար աշխատել ենք, որպեսզի ներկայացնենք մեր տնտեսական և անվտանգային ծրագրերը»,- ընդգծել է նա։
Ըստ նրա՝ տնտեսական ծրագրում տեղ գտած յուրաքանչյուր հանձնառություն երաշխավորվում է Կարապետյանի կողմից։
«Դրանք նախընտրական խոստումներ չեն, մեր ժողովուրդը չի սիրում խոստում բառը։ Դրանք հստակ տնտեսական քայլեր են, որոնք կկիրառվեն Կարապետյանի՝ վարչապետ դառնալուց հետո։ Սա կօգնի բարձրացնել մեր երկրի յուրաքանչյուր քաղաքացու կենսամակարդակը, ինչն էլ կօգնի կասեցնել մարզերի բնակչության նվազումը, վերակենդանացնել աղքատության մեջ գտնվող մեր համայնքները և նոր խթան հաղորդել մեր մայրաքաղաքին»,- ասել է նա։
Հզոր տնտեսությունը՝ խաղաղության ամուր հիմք
Կարապետյանը վստահություն է հայտնել, որ հզոր տնտեսությունն է այն ամուր հիմքը, որի վրա կարելի է կառուցել ուժեղ և երկարատև խաղաղություն։
«Ավելի հզոր տնտեսությունը նշանակում է ավելի մեծ միջոցներ, որոնք կարող են ուղղվել պաշտպանության ամենաժամանակակից կարողությունների և սպառազինության զարգացմանը, բանակին։ Կարապետյանի վարչապետությամբ ՀՀ-ն կընդլայնի իր ռազմավարական, տնտեսական կապերը, իսկ միջազգային կապերը նոր ներդրումներ կբերեն Հայաստան՝ աշխարհի տարբեր ծայրերից»,- ասել է Կարապետյանը։
Նրա խոսքով՝ այսօր և՛ Արևելքը, և՛ Արևմուտքը շահագրգռված են Չինաստանից Եվրոպա տանող անվտանգ ճանապարհով և, պատմականորեն, այդ ճանապարհն անցել է Հայաստանի միջով, այսօր էլ է անցնում: Ըստ Կարապետյանի՝ սա մի հնարավորություն է, որից կարող է օգտվել միայն Կարապետյանի նման ուժեղ առաջնորդը:
«Թույլ Փաշինյանի պայմաններում Հայաստանը պարզապես կհամաձայնի այնպիսի տնտեսական հարաբերությունների, որոնցում հիմնականում շահելու է մյուս կողմը, ինչպես, օրինակ, Ադրբեջանից բենզինի ներմուծման դեպքում էր, երբ մեր քաղաքացիները դեռ պատանդի կարգավիճակում պահվում էին նրանց բանտերում»,- ասել է նա։
«Ուժեղ Հայաստան» ստեղծելու ճանապարհը
Նա շնորհակալություն է հայտնել դահլիճում ներկա բազմաթիվ հերոսներից, ովքեր խիզախորեն մարտնչել են հայրենիքի պաշտպանության համար:
«Ցավոք, նրանք դարձան թույլ Փաշինյանի ղեկավարության զոհը: Հայաստանը պարտվեց պատերազմում՝ թույլ ղեկավարության պատճառով: Այսօր մենք պատմական հնարավորություն ունենք փոխելու այդ իրողությունը: Նրանք փորձել են կանգնեցնել մեզ անցյալում, կփորձեն կանգնեցնել մեզ ապագայում, դա էլ չի հաջողվի: Ո՞վ կարող է կանգնեցնել ձեր կամքը, ստեղծել ուժեղ Հայաստան: Այստեղ ներկա են մարդիկ, ում Ադրբեջանը չի կարողացել կանգնեցնել: Փաշինյանը հաստատ չի կարողանա»,- ասել է նա:
Ըստ Կարապետյանի՝ ներկայիս ղեկավարությանը կարող է առաջարկել միայն ժամանակավոր խաղաղություն, «Ուժեղ Հայաստանը»՝ ուժեղ, երկարատև և երաշխավորված խաղաղություն:
«Մեր անվտանգության ծրագիրը հիմնված է վեց խոստման վրա: Ինչպես տնտեսական, այնպես էլ անվտանգության ծրագրի դեպքում սա նախընտրական խոստում չէ, սա հստակ ծրագիր է, որը Կարապետյանը կսկսի իրականացնել իր վարչապետ դառնալուց հետո՝ հենց առաջին օրվանից»,- ասել է նա։
Կարապետյանը հավելել է, որ մարդիկ հոգնել են թույլ առաջնորդից և հուսահատորեն ուժեղ առաջնորդ են փնտրում: Նաև ընդգծել է, որ մարդկանց ավելի քան 80%-ը, ըստ հարցումների, վախենում է, որ թույլ կառավարությունը Հայաստանի համար կստեղծի նոր մարտահրավերներ և կրկին կարող է հարձակման ենթարկվել:
«Փաշինյանն արդեն երեք պատերազմ է պարտվել: Եվ մենք պետք է կանգնեցնենք նրան, մինչ իր թուլությամբ նոր պատերազմ չհրահրի։ Ուժեղ և երկարատև խաղաղության միակ երաշխիքը ուժեղ Հայաստան ունենալն է: Եկեք բոլորս համախմբվենք ուժեղ առաջնորդի շուրջ, մտնենք յուրաքանչյուր գյուղ, քաղաք և մարդկանց ասենք, որ իրական, ուժեղ առաջնորդը գալիս է ղեկավարելու»,- շեշտել է նա։
Կարապետյանին կալանավորել էին 2025-ի հունիսին՝ եկեղեցու դեմ արշավը քննադատելուց հետո։ Ավելի քան վեց ամիս անազատության մեջ անցկացնելուց հետո՝ դեկտեմբերի 30-ից, նրա նկատմամբ խափանման միջոց էր կիրառվել տնային կալանքը և գրավը։
Փետրվարի 11-ին Կարապետյանը միաձայն ընտրվել էր «Ուժեղ Հայաստան» կուսակցության նախագահ։ Դատարանը մարտի 14-ին ևս մեկ ամսով երկարաձգել էր նրա տնային կալանքը:
Կարդացեք նաև՝
300 հազար նոր աշխատատեղ ու արդյունաբերացում. Սամվել Կարապետյանի 5 քայլերը դեպի ուժեղ Հայաստան
