Դատարանը որոշել է «Տաշիր» ընկերությունների խմբի նախագահ, բարերար Սամվել Կարապետյանի նկատմամբ որպես խափանման միջոց կիրառել տնային կալանքը և գրավը, հայտնել է Կարապետյանի փաստաբանական խմբի անդամ Արամ Վարդևանյանը։
Նա նշել է, որ փաստաբանական թիմի կողմից միջնորդություն էր ներկայացվել դատարան՝ քրեական դատավարության օրենսգրքի 289-րդ հոդվածի մեխանիզմով: Ըստ այդմ՝ այսօր դատական նիստ էր հրավիրվել, որը, ըստ այդ մեխանիզմի, տարբերվում էր նախորդող դատական նիստերից և չէր ենթադրելու երկար տևողություն։
«Քննության առնելով մեր միջնորդությունը՝ դատարանը որոշեց այն բավարարել մասնակի` կիրառելով Կարապետյանի նկատմամբ կրկին ինտենսիվ խափանման միջոց տնային կալանք և գրավ»,- հավելել է Վարդևանյանը:
Վերաքննիչ դատարանը դեկտեմբերի 11-ին մերժել էր Կարապետյանի կալանքը երկարացնելու դեմ բողոքը, ինչը փաստաբանները գործարարի նկատմամբ «քաղաքական հետապնդման շարունակություն» էին համարել։ Փաստաբանները վճռաբեկ բողոքներ էին ներկայացրել Վերաքննիչ դատարանի որոշման դեմ։
Հունիսին Կարապետյանին կալանավորել էին եկեղեցու դեմ արշավը քննադատելուց հետո։ Դատարանն օգոստոսի 15-ից սկսած արդեն մի քանի անգամ երկարացրել է բարերարի կալանքը։ Նոյեմբերի 13-ին ՔԿ-ն Կարապետյանի կալանքը 2 ամսով երկարաձգելու միջնորդություն էր ներկայացրել, որը բավարարվել էր:
