Ռուսական 102-րդ ռազմաբազայի՝ Հայաստանից դուրսբերման հարց օրակարգում չկա, հայտարարել է ՀՀ-ում ՌԴ դեսպան Սերգեյ Կոպիրկինը «Սյունյաց երկիր»-ի հետ հարցազրույցում:
«Այս մասին հստակ հայտարարել է նաև հայկական կողմը։ Ռուսաստանի ռազմական ներկայությունը շարունակում է մնալ Հայաստանի անվտանգության կարևորագույն երաշխավոր և տարածաշրջանային կայունության գործոն։ Մեր զինվորականները որևէ սպառնալիք չեն ներկայացնում տարածաշրջանում»,- ասել է դեսպանը։
Ռուսական ռազմական ներկայության մասին պայմանագիրն ստորագրվել էր Մոսկվայում 1995 թվականի մարտի 16-ին՝ 25 տարի ժամկետով՝ ավտոմատ երկարացումներով յուրաքանչյուր 5 տարին մեկ։ 2010 թվականին Երևանում երկու երկրների կողմից ստորագրվել էր լրացուցիչ արձանագրություն, որով երկարաձգվել էր Ռուսաստանի ԶՈւ ստորաբաժանումների տեղակայման ժամկետը մինչև 2044 թվական՝ նոր հետագա 5-ամյա երկարացմամբ։
Կոպիրկինը մեկնաբանել է նաև Ռուսաստանի դիրքորոշումը TRIPP-ի («Միջազգային խաղաղության և բարգավաճման համար Թրամփի երթուղին») վերաբերյալ՝ ասելով, որ պաշտոնական Մոսկվայի անփոփոխ հիմնարար առաջնահերթություններից մեկն է Հարավային Կովկասում խաղաղության և կայունության ամրապնդումը։
«Աջակցում ենք բոլոր ջանքերին, որոնք ուղղված են Հայաստան-Ադրբեջան հարաբերությունների կարգավորմանը։ Ինչ վերաբերում է «Թրամփի ուղուն», ապա Ռուսաստանի դիրքորոշումը կձևակերպվի, երբ ունենանք մանրամասն պատկերացում, թե ինչպե՞ս է տրանսպորտային այս նախագիծն իրականացվում»,- շեշտել է դեսպանը։
Ներկա պահին, ինչպես ընդգծել է դիվանագետը, համապատասխան աշխատանքները միայն սկսվում են, և անհրաժեշտ է համաձայնեցնել մանրամասները՝ փոխադրումների ռեժիմների, անվտանգ երթևեկության ապահովման վերաբերյալ։
«Տրանսպորտային հաղորդակցությունների ապաշրջափակման գործընթացում անհրաժեշտ կլինի հաշվի առնել Հայաստանի ԵԱՏՄ անդամության հանգամանքները, ինչպես նաև ռուս սահմանապահների ներկայությունը հայ-իրանական սահմանին՝ հիմնված երկկողմ փաստաթղթերի վրա։ Մյուս կողմից, ռուսական կողմը պատրաստ է խորհրդակցությունների ինչպես հայ գործընկերների, այնպես էլ այլ շահագրգիռ կողմերի, այդ թվում՝ Թեհրանի հետ»,- ասել է նա։
Օգոստոսի 8-ին Վաշինգտոնում Հայաստանի և Ադրբեջանի ղեկավարներն ԱՄՆ-ի միջնորդությամբ հռչակագիր էին ստորագրել, որով նաև նախատեսվում է ստեղծել TRIPP (Trump Route for International Peace and Prosperity) տրանսպորտային երթուղի: ՀՀ վարչապետ Նիկոլ Փաշինյանը սեպտեմբերի 29-ին հայտարարել էր, որ ամերիկյան կողմի հետ գործարկման վերաբերյալ կոնկրետ պայմանավորվածություններ դեռևս չկան:
