«Ուժեղ Հայաստան» դաշինքը դատապարտել է գործող իշխանությունների կողմից «Բարգավաճ Հայաստան» կուսակցության առաջնորդ Գագիկ Ծառուկյանի նկատմամբ իրականացվող քաղաքական բռնաճնշումներն ու նրան պատկանող ձեռնարկություններում տեղի ունեցած խուզարկությունները:
«Գործող իշխանությունների կողմից շարունակվող բռնաճնշումների հիմնական նպատակն է լռեցնել ընդդիմադիր ուժերին։ Իրավապահ համակարգի կիրառումը` որպես քաղաքական զենք, ծանր հարված է հասցնում երկրի տնտեսությանը և ներդրումային միջավայրին»,- ասված է դաշինքի հայտարարության մեջ:
Իրավապահների գործողությունները դաշինքն անվանել է երկրում շարունակվող քաղաքական զանգվածային հետապնդումների հերթական օրինակ: Դաշինքից ընդգծել են, որ այս ամենը չունի հանրային աջակցություն, և հավելել, որ երկրին անհապաղ փոփոխություններ են անհրաժեշտ։
«Հայաստանին անհրաժեշտ է փոփոխություն, որը կապահովի իրավունքի գերակայություն, անկախ արդարադատություն և հասարակության բարեկեցություն»,- նշված է հայտարարության տեքստում։
Այսօր ավելի վաղ Հայաստանի 8 ընդդիմադիր քաղաքական ուժ համատեղ հայտարարությամբ դատապարտել էր «Բարգավաճ Հայաստան» կուսակցության առաջնորդի նկատմամբ իրականացվող, բռնաճնշումները, ինչպես նաև նրան պատկանող ձեռնարկություններում անցկացվող խուզարկությունները։
Իրավապահ մարմիններն այսօր առավոտյան խուզարկություններ էին իրականացրել «Բարգավաճ Հայաստան» կուսակցության առաջնորդի առանձնատանը և նրան պատկանող ձեռնարկություններում։ Ծառուկյանն այժմ ձերբակալված է։
