Քննչական կոմիտեում (ՔԿ) քննվող մեկ տասնյակից ավելի քրեական վարույթների շրջանակում «Բարգավաճ Հայաստան» կուսակցության առաջնորդ Գագիկ Ծառուկյանին առնչվող 70-ից ավելի հասցեում կատարվում են միաժամանակյա խուզարկություններ, Armenia Today-ին հայտնել գերատեսչության մամուլի խոսնակ Կիմա Ավդալյանը։
«Արարատցեմետ» գործարանի գլխավոր տնօրենի ժ/պ Արտյոմ Պողոսյանը լրատվամիջոցներին պատմել է, որ իրավապահները միանգամից գրոհելով, նույնիսկ անվտանգության աշխատակիցներին վախեցնելով ու ֆիզիկական ուժ գործադրելով ներխուժել են գործարան։
«Սեփական տարածք մտնելուց պետք է ներկայանալ, բայց՝ չէ՛, ապօրինի ձևով վախեցնելով, էլի եմ ասում, ոմանց վրա ֆիզիկական ուժ գործադրելով, ներխուժել են տարածք, այնուհետև մոտեցել են վարչական շենքին»,- շեշտել է նա։
Պողոսյանը մտավախություն է հայտնել, որ գործարանի՝ այսօր այլևս չարտադրվող տեսակի սարքերը վթարային կերպով անջատելու պատճառով հնարավոր է դրանք շարքից դուրս են եկել ու հետագա աշխատանքը հարցականի տակ է։
Երևանի կոնյակի և գինու կոմբինատի կոմերցիոն տնօրեն Արմեն Զաքարյանը հայտնել է, որ իրավապահները վաղ առավոտյան գործարանի մուտքն արգելափակել են։ Նա նշել է, որ աշխատակիցներին ուղարկել են տուն, քանի որ մինչ աշխատատանքի սկիզբն արդեն օպերատիվ քննչական աշխատանքներ են սկսվել։
«Մենք դինամիկ աշխատող կազմակերպություն ենք, ունենք բազմաթիվ պայմանագրեր արտասահմանյան գործընկերների հետ, ունենք պլանավորված արտահանումներ ու ներմուծումներ։ Այժմ աշխատանքը պարալիզացված է»,- նշել է նա։
«Մուլտի Տաբակ» ընկերության տնօրեն Ջուլիետա Մարգարյանն իր հերթին լրատվամիջոցներին հայտնել է ընթացող խուզարկության մասին։ Նա պատմել է, որ իրավապահները տարածք են ժամանել մոտավորապես ժամը 7:30-ին։ Նրանք, առանց ներկայանալու, բոլոր պահակներին խնդրել են հեռանալ ու սկսել են քննչական գործողությունները։ Մարգարյանը նշել է, որ շենքում ո՛չ ընկերության աշխատակիցներ, ո՛չ էլ փաստաբաններ չկան, քանի որ երեք ամիս է՝ իրենք հարկադիր պարապուրդի մեջ են։
«Մուլտի Ուելնես»-ը նույնպես հայտարարել է խուզարկությունների մասին՝ նշելով, որ իրենց համակարգիչներից տվյալներ են առգրավել։ Ընկերության ֆինանսական տնօրեն Կարապետ Գրիգորյանը ԶԼՄ-ներին ասել է, որ ոչ ոքի թույլ չեն տալիս մտնել շենք՝ բացի ադմինից ու տնօրենից։ Գրիգորյանի խոսքով՝ խուզարկությունը համատեղ վարում են ՊԵԿ-ն ու ՔԿ-ն։
«Բոլոր սենյակները մտնում են, համակարիչներից ինֆորմացիա են հանում։ Բայց դրանք մի քանի օր առաջ մենք արդեն տրամադրել ենք օպերատից խմբերին»,-ասել է նա։
Նա նշել է, որ դրսում գտնվում է ավելի քան 200 աշխատակից, ինչպես նաև հաճախորդներ, որոնք չեն կարողանում մուտք գործել շենք։
Ավելի վաղ՝ հունիսի 25-ին, դատախազությունը դիմել էր ԿԸՀ՝ Ծառուկյանին պատգամավորական անձեռնմխելիությունից զրկելու միջնորդությամբ։ Հունիսի սկզբին նրա դեմ հարուցվել էր քրեական գործ՝ հարկերից խուսափելու փաստով։
Ճնշումներն ընդդիմության նկատմամբ ուժեղացել են խորհրդարանական ընտրություններից հետո։ Իշխող «Քաղաքացիական պայմանագիր» կուսակցությունը ստացել է 64 մանդատ, իսկ Կարապետյանի և Քոչարյանի դաշինքները՝ համապատասխանաբար 29 և 12 մանդատ։ Հուլիսի 4-ին հինգ ընդդիմադիր ուժեր, այդ թվում՝ «Բարգավաճ Հայաստանը», Սահմանադրական դատարանի կողմից ընտրությունների արդյունքների հաստատումից հետո հայտարարել էին դիմադրության նոր փուլի սկսվելու մասին։
