«Ուժեղ Հայաստան» կուսակցության վարչապետի թեկնածու Սամվել Կարապետյանը մեկնաբանել է «Հայաստան» դաշինքի առաջնորդ Ռոբերտ Քոչարյանի և «Բարգավաճ Հայաստան» կուսակցության առաջնորդ Գագիկ Ծառուկյանի հայտարարությունները՝ ընտրություններից հետո վարչապետի թեկնածուներին աջակցելու վերաբերյալ։
«Հայաստան» դաշինքն ավելի վաղ հայտարարել էր ընտրություններում առավելագույն քվե ստացած ընդդիմադիր ուժին աջակցելու պատրաստակամության մասին, իսկ Ծառուկյանը հայտարարել էր ընտրություններից հետո Կարապետյանի թեկնածությունը պաշտպանելու հնարավորության մասին։
«Երկուսն էլ շատ կոռեկտ հայտարարություններ են արել, քանի որ միջազգայնորեն ընդունված փաստ է, որ կառավարությունը ձևավորում է առաջին տեղն զբաղեցրած ուժը։ Քանի որ վստահ ենք, որ այդ ուժը մենք ենք լինելու, դրա համար շատ շուտով նրանք այդ հնարավորությունը կունենան պաշտպանել մեր կուսակցության թեկնածուին»,- ասել է նա։
Պատասխանելով 300 000 ադրբեջանցու հնարավոր բնակեցման հետ կապված սպառնալիքների վերաբերյալ հարցին՝ Կարապետյանը խոսել է Հայաստանի թուրքացման վտանգի մասին։
«Սյունիքը կորցնելու վտանգ եմ տեսնում, Սևանի Գյոլչա դառնալու վտանգ եմ տեսնում, Հայաստանի թրքացման վտանգ եմ տեսնում, բայց մի՛ անհանգստացեք։ Մենք դրա դիմաց ստեղծելու ենք 300 000 աշխատատեղ, նույնիսկ մեկը թողնելու ենք Փաշինյանի համար՝ թմբուկ նվագելը»,- ասել է «Ուժեղ Հայաստան» կուսակցության առաջնորդը։
Նա նաև մեկնաբանել է վարչապետ Նիկոլ Փաշինյանի այն հայտարարությունը, որով նա հրաժարվում է միջազգային մակարդակով բարձրացնել Արցախում եկեղեցիների ոչնչացման հարցը։
«Շեֆից շատ է վախենում, բա որ Ալիևը (Ադրբեջանի նախագահ Իլհամ Ալիև-խմբ․) ջղայնանա հանկարծ։ Եթե մարդն իր խմբակով հարձակվում է Էջմիածնի վրա, իր համար ի՞նչ կապ ունի՝ Արցախում մի 100 եկեղեցի կքանդեն-չեն քանդի»»,- հարցրել է Կարապետյանը։
Հակակոռուպցիոն դատարանն ապրիլի 17-ին որոշ մեղմացումներով 3 ամսով երկարաձգել էր Կարապետյանի տնային կալանքը։ Նա կազմել էր քաղաքական ուժի նախընտրական վերջնական ցուցակը, որը հրապարակվել էր ապրիլի 21-ին։ Ապրիլի 23-ին Կարապետյանը թիմակիցների հետ քննարկել էր Հայաստանի զարգացմանն ուղղված ծրագրերը։ Կարապետյանի համոզմամբ՝ Հայաստանի սրընթաց զարգացումը հնարավոր է 24/7 աշխատանքային ռեժիմի դեպքում։
