ՀՀ վարչապետ Նիկոլ Փաշինյանը կառավարության նիստից հետո ճեպազրույցում հայտարարել է, որ Ստեփանակերտի Սուրբ Աստվածամոր Հովանու մայր տաճարի քանդման հարցը որպես միջազգային քննարկման թեմա չի դիտարկում։
Նրա խոսքով՝ խաղաղության գործընթացում Հայաստանի առաջնահերթություններն այլ են, բայց իշխանությունները շարունակում են հավաքել և վերլուծել առկա տեղեկատվությունը։
«Հիմա փորձում ենք ամբողջությամբ հավաքել տեղեկատվությունը և վերլուծել այն։ Չեմ կարծում, որ մեր նախորդ փորձը հաշվի առնելով՝ հարցը միջազգային քննարկումների առարկա կդարձնենք պետական մակարդակով»,- նշել է Փաշինյանը։
Վարչապետը հավելել է, որ նման հարցերին պետք է մոտենալ «շրջահայաց»՝ դրանք համեմատելով «երկսայր սրի» հետ։
«Ասել եմ՝ խաղաղության իմ չափանիշը որն է. արդեն ավելի քան երկու տարի՝ Հայաստան-Ադրբեջան փոխհրաձգության հետևանքով մարդիկ չեն զոհվում, չեն վիրավորվում, ՀՀ-ն և Ադրբեջանը ճանաչել են միմյանց տարածքային ամբողջականությունն ու ինքնիշխանությունը, սահմանների անխախտելիությունը։ Ադրբեջանը և Հայաստանը հարցերին պետք է նայեն այս տեսակետից»,- հավելել է նա։
Ավելի վաղ արբանյակային պատկերների հիման վրա հաղորդվել էր, որ Ստեփանակերտի Սուրբ Աստվածածին մայր տաճարը քանդվել է։ Կարմիր տուֆից կառուցված եկեղեցու տեղում այժմ երևում է դատարկ տարածք։ 2019 թվականին կառուցված տաճարը համարվում էր քաղաքի կարևոր խորհրդանիշներից մեկը։
Ադրբեջանը, որը Արցախն օկուպացնելուց հետո վանդալիզմի է ենթարկում հայկական մշակութային ժառանգությունը, ապրիլին ավերել էր նաև Արցախի Սուրբ Աստվածամոր Հովանու մայր տաճարը:
Արդարադատության միջազգային դատարանը 2021 թվականի դեկտեմբերի 7-ին «Հայաստանն ընդդեմ Ադրբեջանի» գործով պարտավորեցրել էր Բաքվին ձեռնարկել բոլոր անհրաժեշտ միջոցները՝ կանխելու և պատժելու հայկական մշակութային ժառանգության, այդ թվում՝ եկեղեցիների և այլ պաշտամունքի վայրերի նկատմամբ վանդալիզմի և պղծման գործողությունները:
