«Ուժեղ Հայաստան» կուսակցության նախագահ, ՀՀ վարչապետի թեկնածու Սամվել Կարապետյանն ԱԺ ընտրություններին ընդառաջ «Ուժեղ խաղաղություն» անվտանգության ծրագրի շնորհանդեսին հայտարարել է, որ իրենց հիմնական 3 ուղղությունն են ուժեղ բանակը, խելացի դիվանագիտությունն ու տնտեսական անկախությունը։ Շնորհանդեսի ուղիղ հեռարձակումը՝ Armenia Today-ի Youtube-ի ալիքով։
Նա հայտարարել է, որ իր առաջարկած «Ուժեղ խաղաղության» հայեցակարգը հիմնված է այն համոզման վրա, որ խաղաղությունը պահպանվում է ուժով, ոչ թե թուլությամբ։
«Հանրահայտ կանոն է, պատերազմը գալիս է այնտեղ, որտեղ չկա ուժ: Թույլ բանակը հրահրում է թշնամուն, իսկ ուժեղ բանակը պահպանում է խաղաղությունը: Հայաստանը պետք է դադարեցնի խաղաղություն աղերսելու քաղաքականությունը և անցնի «Առաջնայինը՝ Հայաստանը և մեր շահերը» քաղաքականության»,- նշել է Կարապետյանը։
Նա կարևորել է պրոֆեսիոնալ բանակի ձևավորումը՝ նշելով, որ զինվորական ծառայությունը պետք է հիմնված լինի բարձր պատրաստվածության, ժամանակակից տեխնոլոգիաների և արժանապատիվ պայմանների վրա։ Կարապետյանը շեշտել է՝ հաճախ է մտածում, ինչպե՞ս կառուցել այնպիսի Հայաստան, որտեղ ծառայության տարիքին հասնելը լինի վստահության, ոչ թե վախի պատճառ:
Կարապետյանը նշել է, որ արժանապատիվ զինծառայությունը և դրանից հետո զինծառայողին արժանավայել կյանքն իր թիմի համար առաջնահերթություն է: Այս համատեքստում նշել է իր ծրագրի ու այն մշակելու գործընթացի մասին, որին մասնակցել են նաև միջազգային փորձագետներ։
«Մենք մշակել ենք «Ուժեղ խաղաղություն» համակարգային ծրագիր՝ անվտանգության և դիվանագիտության ոլորտի միջազգային փորձագետների հետ: Ուժեղ բանակի, խելացի դիվանագիտության և տնտեսական անկախության համակարգային ծրագրի իրագործման միջոցով ենք ունենալու ուժեղ Հայաստան»,- ընդգծել է նա։
Կարապետյանի խոսքով՝ հայրենիքն սկսվում է սահմանից, հայրենիքի նկատմամբ սերը՝ նույնպես:
«Հայաստանի սահմանները պետք է լինեն անկոտրուն և անխախտ։ Մշտական հետախուզական համակարգման կենտրոնները, անօդաչու հետախուզությունը և արհեստական բանականության վերլուծությունը հնարավորություն են տալու մեր սահմանները պահել անառիկ, իսկ մեր զինվորներին՝ պաշտպանված»,- շեշտել է նա։
Նրա խոսքով՝ պատմությունը ցույց է տվել, որ չհանձնվող և կառուցող ազգերն են հաղթում, և Հայաստանը կխոսի աշխարհի հետ վստահ՝ ուժեղի դիրքից։
«Մեր արտաքին քաղաքականությունը կլինի պրագմատիկ, հավասարակշռված: Արևելքի և Արևմուտքի միջև մեր վարած բանակցությունները կլինեն հստակ՝ պահպանելով մեր կարմիր գծերը։ Տարածաշրջանի հետ մեր կապերը կհիմնվեն փոխշահավետության սկզբունքի վրա, ոչ թե միակողմանի զիջումների: Մենք առաջարկում ենք ուժեղ, մնայուն խաղաղություն։ Ժամանակն է ուժեղ խաղաղության, վաղը ուշ է լինելու»,- վստահեցրել է նա։
Կարապետյանի դիտարկմամբ՝ ուժեղ Հայաստանը պաշտպանություն չի խնդրելու, այլ կառուցելու է սեփական ուժերով:
«Թույլերը չեն կարող լռեցնել ուժեղներին, Հայաստանը չի կարող լռեցվել, այլևս թույլ չենք լինելու»,- հավաստիացրել է նա։
Գործարարի խոսքով՝ իշխանության գալու դեպքում իր թիմը կշարունակի երկխոսությունը Հայաստանի ռազմավարական գործընկերների հետ՝ միաժամանակ խորացնելով կապերն այլ գերտերությունների ու երկրների հետ:
«30 տարի բիզնեսում ինքս նախ սովորել և իրացրել եմ հմտություններս բանակցելու ուժեղի դիրքերից: Հաստատել եմ կապեր աշխարհի տարբեր կենտրոններում: Այդ փորձն ու միջազգային կապերը ծառայեցնելու եմ Հայաստանի արտաքին քաղաքականությանը»,- նշել է նա։
Կարապետյանը նաև կարևորել է Սփյուռքի դերակատարությունը՝ նշելով, որ այն պետք է վերածվի ոչ միայն հուզական, այլև ռազմավարական ռեսուրսի՝ ներդրումների, ենթակառուցվածքների և միջազգային ազդեցության միջոցով։
Շնորհանդեսին «Ուժեղ Հայաստանն» առաջարկել էր 6 լուծում՝ ՀՀ անվտանգային համակարգն ամրապնդելու համար։
Կարապետյանին կալանավորել էին 2025-ի հունիսին՝ եկեղեցու դեմ արշավը քննադատելուց հետո։ Ավելի քան վեց ամիս անազատության մեջ անցկացնելուց հետո՝ դեկտեմբերի 30-ից, նրա նկատմամբ խափանման միջոց էր կիրառվել տնային կալանքը և գրավը։
Փետրվարի 11-ին Կարապետյանը միաձայն ընտրվել էր «Ուժեղ Հայաստան» կուսակցության նախագահ։ Դատարանը մարտի 14-ին ևս մեկ ամսով երկարաձգել էր նրա տնային կալանքը:
Կարդացեք նաև՝
300 հազար նոր աշխատատեղ ու արդյունաբերացում. Սամվել Կարապետյանի 5 քայլերը դեպի ուժեղ Հայաստան
