Լոռիում ենթադրյալ ընտրակաշառքի գործով ձերբակալվել են Գագիկ Ծառուկյանի «Բարգավաճ Հայաստան» կուսակցության կողմնակիցներ, հայտնել է ՀՀ հակակոռուպցիոն կոմիտեն։
Կոմիտեի տվյալներով՝ կուսակցության ներկայացուցիչները, ենթադրաբար, գումար են փոխանցել Լոռու մարզի Ախթալա համայնքի և հարակից տարածքների բնակիչներին՝ խորհրդարանական ընտրություններում ԲՀԿ-ի օգտին քվեարկելու և նոր կողմնակիցներ ներգրավելու դիմաց։
Ընտրակաշառք տալու ենթադրյալ դեպքի առթիվ քրեական հետաքննություն է սկսվել։ Իրականացվել են դատավարական գործողություններ։ Կոմիտեն հրապարակել է քննությանը վերաբերող ձայնագրություն։
Հունիսի 7-ին ՀՀ-ում անցկացվել էին Ազգային ժողովի ընտրություններ, որին մասնակցել էր 18 քաղաքական ուժ՝ 16 կուսակցություն և 2 դաշինք։ ԿԸՀ նախնական տվյալներով՝ 2 503 976 ընտրողից մասնակցել էր 1 477 736-ը (58,94%)։ Նախնական տվյալներով՝ անցողիկ շեմը հաղթահարել էր քաղաքական երեք ուժ՝ «Քաղաքացիական պայմանագիրը» (49,825%), «Ուժեղ Հայաստան» դաշինքը (23,281%) և «Հայաստան» դաշինքը (9,934%)։
«Բարգավաճ Հայաստան» կուսակցությունը, որը նախնական արդյունքով չի հաղթահարել անցողիկ 4%-ի շեմը, վերահաշվարկ էր պահանջել։ Շուրջ 50 ընտրատեղամասում վերահաշվարկի դիմում էր ներկայացրել նաև «Ուժեղ Հայաստանը»։ «Հայաստան» դաշինքը վերջնական արդյունքների հրապարակումից հետո կդիմի Սահմանադրական դատարան։ «Ուժեղ Հայաստանն» ավելի ուշ՝ հունիսի 12-ին, ընտրությունների արդյունքներն անվավեր ճանաչելու դիմում էր ներկայացրել ԿԸՀ, պահանջել նաև վերաքվեարկություն՝ 2 տեղամասերում։
Հունիսի 12-ին ԿԸՀ-ն ամփոփել էր 637 ընտրական տեղամասերի ընտրական հանձնաժողովների իրականացրած վերահաշվարկի արդյունքները: Ընտրությունների վերջնական արդյունքը կհրապարակվի հունիսի 14-ին՝ ինքնաշխատ եղանակով վերահաշվարկներից հետո։
Կարդացեք նաև՝
Ի՞նչ խախտումներ են արձանագրվել ընտրատեղամասերում
