ԿԳՄՍ նախարար Ժաննա Անդրեասյանը հայտարարել է, որ Հայաստանում տարածաշրջանային լեզուների ուսուցման ծրագրի շրջանակում ՀՀ երեք դպրոց ուսումնասիրում է ադրբեջաներեն։
Լրագրողների հետ ճեպազրույցում նախարարը նշել է, որ 2021 թվականին ընդունված որոշման շրջանակում 400 դպրոց ցանկություն էր հայտնել որևէ տարածաշրջանային լեզու ուսումնասիրել, սակայն միայն 30 դպրոցում է հաջողվել ներդնել ծրագիրը։
«Այստեղ ունեցանք կադրերի լուրջ խնդիր, որովհետև, բնական է, ցանկություն կարող են ունենալ, բայց մասնագետներ պիտի լինեն, որպեսզի ուսուցում իրականացնեն, և դրա պատճառով շուրջ երեք տասնյակ դպրոցներ են, որ կարողացել են տարբեր տարածաշրջանային լեզուների ուսուցանում իրականացնել»,- մանրամասնել է Անդրեասյանը։
Նախարարի խոսքով՝ ավելի ակտիվ է պարսկերենը, քանի որ նաև դեսպանատան հետ համատեղ աշխատանք կա մասնագետների լեզվի իմացությունը բարելավելու ուղղությամբ։ Վրացերենի ուսուցումը ևս ներդրվել է երեք դպրոցում, պարզաբանել է Անդրեասյանը։
«Միայն պետք է խրախուսեմ, որպեսզի մեր ավելի շատ դպրոցներ տարածաշրջանային լեզուներ ուսուցանեն։ Ապրում ենք այս տարածաշրջանում, լեզուների ուսուցանումը նաև միջոց է ճանաչել այն։ Կարծում եմ՝ շատ կարևոր է այդ գիտելիքը տարածել, որպեսզի խոսելիս նաև հասկանանք՝ ինչի մասին ենք խոսում։ Բոլորովին վերջերս Երևան էր այցելել Վրաստանի կրթության նախարարը: Հարցերից մեկը, որ քննարկել ենք, վրացերենի մասնագետների պատրաստման խնդիրն է, որպեսզի կարողանանք ոչ թե երեք դպրոցում ունենալ վրացերենի ուսուցանում, այլ ավելի շատ դպրոցներում»,- շեշտել է նախարարը։
