Օսմանյան Կայսրության գոյության վերջին շրջանում տեղի ունեցած Մեծ Եղեռնի՝ Հայոց ցեղասպանության իրադարձությունները խորը հետք են թողել յուրաքանչյուր հայի հոգու և գիտակցության մեջ, քանի որ Հայաստանի շատ քաղաքացիների համար ցեղասպանությունը ոչ միայն ազգային, այլև ընտանեկան, անձնական ողբերգություն է, Հայոց ցեղասպանության 110-րդ տարելիցի իր ուղերձում ասել է ՀՀ վարչապետ Նիկոլ Փաշինյանը։
Ըստ նրա՝ այս ողբերգությունը վերապրելը վերջին ավելի քան մեկդարյա ազգային օրակարգի առանցքային հարցերից է՝ անկախ նրանից, թե որքանով է ձևակերպված որպես այդպիսին։
«Այս օրակարգի շուրջ կառավարության և անձամբ իմ մտորումներն ու մտածումները հանգում են հետևյալին․ զարգացած, ինքնիշխան, անվտանգ, այսինքն՝ սահմանազատված և սահմանագծված սահմաններով Հայաստանի Հանրապետությունն է Մեծ Եղեռնի ողբերգությունը վերապրելու միջոցը, մեր ժողովրդի բոլոր զոհողություններին և զոհերին մեր հավատարմության առհավատչյան»,- նշել է նա։
Ըստ վարչապետի՝ պետությամբ և պետական շահերով, միջազգայնորեն ճանաչված տարածքով, հարևանների հետ կարգավորված հարաբերություններով, բաց սահմաններով, խաղաղությամբ, աշխատանքով, բարեկեցությամբ, ազատ և պաշտպանված քաղաքացիներով պետք է վերապրել Մեծ Եղեռնի ողբերգությունը։
«Մենք գնում ենք այս ճանապարհով, որովհետև այսպես ենք վերծանում այն ուղերձը, որ մեզ հղում է պատմությունը, այսպես ենք վերծանում ձեզնից յուրաքանչյուրի, ՀՀ յուրաքանչյուր քաղաքացու սրտի տրոփյունը, որ չի հեռարձակվում ոչ մի հեռուստատեսությամբ, չի արտահայտվում ոչ մի սոցիալական ցանցում, բայց լսելի է ձեր քվեով Հայաստանի Հանրապետությունում ձևավորված կառավարող մեծամասնությանը, լսելի է անձամբ ինձ»,- հավելել է վարչապետը։
Ըստ նրա՝ այս ճանապարհով գնալը լավատեսության կամ հոռետեսության հարց չէ, այլ առաքելության՝ ապահովելու Հայաստանի Հանրապետության, հայրենիք-պետության հարատևությունը, և անցնելով դաժան փորձությունների ու ողբերգությունների միջով՝ վաստակել ենք այդ հնարավորությունը, որը չպիտի բաց թողնել։
«Համոզված եմ, մենք՝ ժողովուրդն ու նրա ընտրած կառավարող թիմը բաց չեն թողնի այս հնարավորությունը՝ հանուն մեր նահատակների և հանուն մեր սերունդների»,- եզրափակել է Փաշինյանը։
Ապրիլի 24-ին լրանում է Օսմանյան կայսրության կողմից 1915 թվականին հայերի նկատմամբ իրականացված Ցեղասպանության 110-րդ տարելիցը։ Աշխարհասփյուռ հայությունը ոգեկոչման միջոցառումներով կհիշի 1,5 միլիոն անմեղ զոհերի հիշատակը։ Հայոց ցեղասպանությունը պաշտոնապես ճանաչել է 34 պետություն, ավելի քան 70 կազմակերպություն։ 110 տարի անց Թուրքիան շարունակում է ժխտել Մեծ եղեռնի իրողությունը և պայքարում է Ցեղասպանության միջազգային ճանաչման դեմ՝ նենգափոխելով պատմությունը։
Մարտին Փաշինյանը թուրքական լրատվամիջոցներին տված հարցազրույցում հայտարարել էր, որ Հայոց ցեղասպանության միջազգային ճանաչումը պաշտոնական Երևանի արտաքին քաղաքական առաջնահերթություններից չէ։
Կարդացեք նաև`
Ականատեսների հուշեր և փաստեր. Հայոց ցեղասպանության մասին գրքերի ընտրանի
Դիվանագիտության և հիշողության միջև. ինչպե՞ս է Հայաստանի արտաքին քաղաքականությունը հասել Ցեղասպանության միջազգային ճանաչմանը
Ուրուգվայից մինչև ԱՄՆ. Հայոց ցեղասպանության ճանաչման ուղին
