Հայոց ցեղասպանության միջազգային ճանաչումն այսօր մեր արտաքին քաղաքական առաջնահերթությունների մեջ չէ, թուրքական լրատվամիջոցներին տված հարցազրույցում հայտարարել է ՀՀ վարչապետ Նիկոլ Փաշինյանը։ Միաժամանակ նա նշել է, որ Մեծ Եղեռնի փաստը հնարավոր չէ ժխտել։
«Ուզում եմ շատ հստակ լինի, որ Հայաստանում և հայության շրջանում դա անառարկելի ճշմարտություն է։ Մեր իրականության մեջ հնարավոր չէ դա ժխտել կամ ուրանալ, որովհետև դա բոլորիս համար անուրանալի ճշմարտություն է»,- ասել է նա։
Վարչապետի խոսքով՝ այն ժամանակաշրջանում, երբ այդ «մեծ ողբերգությունը» տեղի է ունեցել, Հայաստանի Հանրապետություն գոյություն չի ունեցել։
«Այսօր կա Հայաստանի Հանրապետություն, միջազգային ճանաչված պետություն, և միջազգայնորեն ճանաչված այդ պետությունն ունի հնարավորություն՝ ապահովելու սեփական քաղաքացիների անվտանգությունը և բարեկեցությունը, բայց դրա համար անհրաժեշտ են որոշակի պայմաններ»,- նշել է նա։
Փաշինյանի կարծիքով՝ Երևան-Անկարա հարաբերություններում կորսվել է պատճառահետևանքային կապը։ Եվ ըստ նրա՝ թե՛ Հայաստանի, թե՛ Թուրքիայի կողմից հնչել են ուղերձներ, որ կա ցանկություն առկա հարցերի ձևակերպումները, շեշտադրումները, դիտանկյունները փոխել։
«Միջին վիճակագրական ընկալումը Հայաստանում այն է, որ Թուրքիան սպառնալիք է Հայաստանի անվտանգության համար։ Եվ ես ենթադրում եմ, որ երբեմն այն բառամթերքը, ընդհուպ՝ քաղաքական բառամթերքը, որ Հայաստանիում օգտագործվում է, պարտադիր չէ, որ պաշտոնական մակարդակում, բայց երբեմն նաև պաշտոնական մակարդակում, դա կարող է ընկալվել որպես սպառնալիք Թուրքիայի համար»,- հավելել է վարչապետը։
Նա համոզմունք է հայտնել, որ հետևողական, հանդարտ, փաստարկների վրա հիմնված, փոխադարձ հարգանքի մթնոլորտում, փոքր քայլերով առաջ շարժվելու դեպքում երկու երկրների հարաբերություններում կլինի կարգավորում։
«Կարող է այդ կարգավորումը հետաձգվի ևս երեք ամսով, վեց ամսով, մի տարով: Բայց այսօր արդեն իմ ընկալումն այն է, որ դա ժամանակի հարց է, և մենք պետք է համբերատար այդ ժամանակի հետ քայլենք և առաջնորդվենք չվնասելու տրամաբանությամբ։ Եթե մենք շատ կոնկրետ դիտավորյալ վնասներ չհասցնենք այս գործընթացին, փոխադարձաբար, իմ կարծիքով, Հայաստան-Թուրքիա հարաբերությունների կարգավորումը հիմա արդեն ժամանակի հարց է»,- հավելել է Փաշինյանը:
Մանրամասները՝ տեսանյութում։
