Ռուսաստանի և ԱՄՆ-ի նախագահներ Վլադիմիր Պուտինը և Դոնալդ Թրամփն այսօր հեռախոսազրույց են ունեցել՝ նախորդ շփումից 59 օր անց, հայտնում է ՏԱՍՍ-ը։
Նշվում է, որ զրույցը տարեսկզբից ի վեր ութերորդն էր և տևել է ավելի քան երկու ժամ։ Սպիտակ տան մամուլի քարտուղար Քերոլայն Լևիտի խոսքով՝ ԱՄՆ-ի և Ռուսաստանի նախագահների միջև հեռախոսազրույցը լավ և արդյունավետ էր։
Թրամփը նույնպես Ռուսաստանի առաջնորդի հետ զրույցը շատ արդյունավետ է անվանել՝ վստահություն հայտնելով, որ արդյունքում զգալի առաջընթաց է գրանցվել։
Կողմերը համաձայնել են քննարկել Ուկրաինայի շուրջ ստեղծված իրավիճակը բարձր մակարդակի խորհրդականների հետ։ Թրամփի խոսքով՝ երկու առաջնորդի օգնականների հանդիպման վայրը դեռևս որոշված չէ։ Սպիտակ տունը վստահեցրել է, որ Թրամփը շարունակում է լիովին հանձնառու մնալ Ուկրաինայում կարգավորմանը նպաստելուն։
Լևիտի խոսքով՝ ամերիկացի առաջնորդի և Ուկրաինայի նախագահ Վլադիմիր Զելենսկու հանդիպումը կլինի «հակամարտության ուկրաինական կողմի հետ կարգավորման շուրջ բանակցությունների շարունակությունը»։
Ամերիկացի նախագահը հայտարարել է, որ հոկտեմբերի 17-ին Զելենսկու հետ հանդիպման ժամանակ կքննարկի Ռուսաստանի առաջնորդի հետ իր զրույցի արդյունքները։ Թրամփը հայտարարել է նաև, որ շուտով ինքը և Պուտինը կրկին դեմ առ դեմ հանդիպում կունենան Բուդապեշտում։
Պուտինն ու Թրամփն օգոստոսի 15-ին Ալյասկայում շուրջ 3 ժամ բանակցություններից հետո հայտարարել էին, որ որոշ հարցերում առաջընթաց է գրանցվել։
