Թուրքիայի նախագահ Ռեջեփ Թայիփ Էրդողանը հայտարարել է, որ իր երկիրը ռազմական արդյունաբերության արտահանողների շարքում զբաղեցնում է 11-րդ տեղը, չի ներխուժում ոչ մեկի տարածք և թույլ չի տա, որ իր իրավունքները խախտվեն, փոխանցում է ՏԱՍՍ-ը։
«Մենք անհավանական բարձունքների ենք հասել պաշտպանության ոլորտում։ Անցյալ ամիս մենք պատմական հաջողության հասանք՝ արտահանելով 996 մլն դոլարի պաշտպանական և ավիատիեզերական արտադրանք։ Մենք աշխարհում 11-րդ խոշորագույն պաշտպանական արտահանողն ենք և այն երկրներից մեկը, որը կարող է միաժամանակ կառուցել մեծ թվով ռազմանավեր։ Մենք կառուցում ենք ավելի քան 50 ռազմանավ՝ բարեկամ և դաշնակից երկրներ արտահանման համար», - ասել է նա Ստամբուլում՝ Ռումինիայի և Թուրքիայի ռազմածովային ուժերին երկու ռազմանավ հանձնելու արարողության ժամանակ։
Նրա խոսքով՝ «Թուրքիայի նպատակը տարածաշրջանում լարվածություն ստեղծելը չէ, այլ խաղաղության, արդարության, անդորրի և կայունության ամրապնդումը»։
Նա նաև նշել է, որ «աշխարհը ապրում է Սառը պատերազմից ի վեր ամենախորը փոխակերպումներից մեկը, և ի հայտ է գալիս նոր անվտանգության մոդել»։ «Մենք ապրում ենք քաոսային ժամանակաշրջանում, երբ նրանք, ովքեր ուժեղ չեն, չեն կարողանում տեղ գտնել բանակցությունների սեղանի շուրջ կամ նույնիսկ կարող են իրենք դառնալ մենյուի մաս», - ասել է Թուրքիայի նախագահը։
Նավաշինության ոլորտում, նշել է Էրդողանը, Թուրքիան «արտադրում է տարբեր ապրանքներ՝ ազգային ավիակիրից մինչև սուզանավեր, որոնց 80 %-ը տեղական պարունակություն ունի»։ Միևնույն ժամանակ, շարունակվում են «տարբեր կարիքներ բավարարող անօդաչու ծովային տրանսպորտային միջոցների ոլորտում հետազոտական, նախագծային և արտադրական աշխատանքները»։
Նախագահը հավելել է, որ ներկայումս իրականացվող նախագծերի ընդհանուր արժեքը հասել է 25 մլրդ եվրոյի։
