ԱՄՆ-ի և Իսրայելի կողմից Իրանին հասցված ավիահարվածները լուրջ վնաս են հասցրել արդյունաբերությանը և սպառնում են երկրի աշխատուժի կեսին անգործ թողնել, հայտնում է ՌԲԿ-ն՝ հղում անելով Associated Press (AP)-ին։
Նշվում է, որ 20 000 ձեռնարկություն ոչնչացվել է՝ Իրանի ընդհանուր արտադրական հզորության մոտավորապես 20%-ը։ Հրապարակման համաձայն՝ ռմբակոծությունների ժամանակ վնասվել են հազարավոր իրանական գործարաններ։ Վնասվածների թվում են խոշոր դեղագործական հոլդինգային ընկերությունը, օպտիկայի և քիմիական գործարանները, ալյումինի գործարանները և ցեմենտի գործարանները։
Հատկապես լուրջ վնասներ են կրել պողպատի և նավթաքիմիական արդյունաբերությունները։ Պողպատի խոշորագույն երկու արտադրող դադարեցրել է արտադրությունը, ավելի քան 50 նավթաքիմիական համալիր՝ փակվել։ Քանի որ բոլոր ոլորտները կախված են նավթաքիմիական արտադրանքից, գների աճն ազդել է գրեթե ամեն ինչի վրա՝ պլաստմասսայից և խողովակներից մինչև գործվածքներ և սննդի փաթեթավորում։
Ըստ AP-ի՝ հղում անելով Իրանի աշխատանքի փոխնախարարին, երկիրը պատերազմի անմիջական հետևանքով կորցրել է առնվազն 1 մլն աշխատատեղ։ Տնտեսագետներն զգուշացնում են, որ մինչև 10-12 մլն աշխատատեղ՝ երկրի աշխատուժի կեսը, կարող է վտանգի տակ լինել։ Կանխատեսվում է, որ մարդկանց խնայողությունները կսկսեն նվազել առաջիկա շաբաթներին։
ԱՄՆ-ն և Իսրայելն սկսել էին հարվածներ հասցնել Իրանին փետրվարի 28-ին, ապրիլի 8-ին ԱՄՆ-ն և Իրանը համաձայնության էին եկել երկշաբաթյա հրադադարի շուրջ, որը ներառում էր Հորմուզի նեղուցի անհապաղ բացում: Իսլամաբադում կայացած բանակցությունների առաջին փուլն ավարտվել էր անարդյունք։ Ապրիլի 22-ին նախատեսված բանակցությունների երկրորդ փուլը չէր կայացել։ Ապրիլի 27-ին ԶԼՄ-ները գրել էին, որ Իրանն ԱՄՆ-ին առաջարկել է բացել Հորմուզի նեղուցը։
