Ռուսաստանի երեք միլիոնանոց հայ համայնքը ներկայացնող Ռուսաստանի հայերի միության խորհրդի անդամները ամոթալի են համարում Հայաստանի իշխանությունների կողմից Հայ Առաքելական եկեղեցու հետապնդումը:
«Հայ ժողովրդի պատմության մեջ երբեք նման ամոթալի դեպք չի գրանցվել։ Եկեղեցու, բիզնեսի և սփյուռքի դեմ իր սադրիչ գործողություններով՝ ՀՀ վարչապետ Նիկոլ Փաշինյանը փորձում է ոչնչացնել այն ամենը, ինչի վրա հիմնված է մարդկային բնույթը։ Սա արվում է, որպեսզի հայ ժողովրդին՝ իր դարավոր հոգևոր և բարոյական արժեքներով, հպարտությամբ և պատվով ներկայացնող ոչ մի ուժ չհասնի 2026 թվականի ընտրություններին»,- ասվում է հաղորդագրությունում։
Հայ համայնքը Հայաստանի կառավարությանը և իրավապահ մարմիններին կոչ է անում պահպանել երկրի Սահմանադրությունը և չգերազանցել իրենց լիազորությունները։
«Հայերը գոյատևել են և աշխարհին ներկայացել որպես բարձր մարդկային ներուժ ունեցող ազգ՝ մեծ մասամբ շնորհիվ մեր եկեղեցու և հոգևորականության, որոնք փոխարինել են պետությանն ամենադժվար պատմական ժամանակներում։ Այսօր եկել է ժամանակը, որ հայ ժողովուրդն ուս-ուսի տված կանգնի՝ պաշտպանելու Հայ առաքելական եկեղեցին, որի զավակներն էին մեր հայրերը, պապերը, նախապապերը, մենք և կլինեն մեր երեխաները՝ անկախ նրանից, թե որտեղ ենք ապրում»,- ասվում է հայտարարությունում։
Հունիսի 27-ի առավոտյան փաստաբան Միհրան Պողոսյանը տեղեկացրել էր, որ 30 դիմակավորված անձ ներխուժել է Շիրակի թեմի առաջնորդարան։ Ավելի ուշ Աջապահյանի փաստաբան Թամարա Յայլոյանը հայտներ էր, որ իրեն թույլ չեն տվել ներկա գտնվել առաջնորդարանում տեղի ունեցող խուզարկությանը։
Հունիսի 26-ին հայտնի էր դարձել, որ Աջապահյանի նկատմամբ հունիսի 17-ին քրեական վարույթ էր նախաձեռնվել Քրեական օրենսգրքի 422-րդ հոդվածի 2-րդ մասով (Իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչերը, որը պատժվում է ազատազրկմամբ՝ առավելագույնը 5 տարի ժամկետով)։
Հունիսի 25-ին ԱԱԾ-ն խուզարկություններ էր իրականացրել «Սրբազան պայքար» շարժման աջակիցների բնակարաններում իշխանության զավթման փորձի շուրջ քրեական գործի շրջանակում։ Այն հարուցվել էր Civic.am կայքի հրապարակած փաստաթղթի հիման վրա, որն, ըստ կայքի, «Հեղաշրջման պլան» էր։ Քննչական կոմիտեն հայտնել էր գործողությունների մասին։
Իրավապահներն, ընդհանուր առմամբ, 17 անձի նկատմամբ կալանքի միջնորդություն էին ներկայացրել դատարան։ Նրանցից 15-ի նկատմամբ դատարանը կիրառել էր կալանք՝ երկու ամիս ժամկետով։ Կանալավորվածների թվում է «Սրբազան շարժման» առաջնորդ Բագրատ Գալստանյանը։
