Դատարանը երկու ամսով կալանավորել է ընդդիմադիր «Սրբազան պայքար» շարժման առաջնորդ Բագրատ արքեպիսկոպոս Գալստանյանին, հայտնել է փաստաբան Հովհաննես Խուդոյանը։
Ավելի վաղ կալանավորվել էին Արցախի Հանրապետության ԱԺ պատգամավոր Դավիթ Գալստյանը, «Սրբազան պայքարի» ակտիվիստ Լիդյա Մանթաշյանը, Բագրատ սրբազանի օգնական Մովսես Շարբաթյանը, բլոգեր Արմեն Ալեքսանյանը, պահեստազորի գնդապետ Միհրան Մախսուդյանը, 44-օրյա պատերազմում զոհված հերոս Հակոբ Ռոստոմյանի հայրը՝ Արա Ռոստոմյանը, Աղվան Արշակյանը։ Արշակյանից բացի, նրանց բոլորի նկատմամբ երկամսյա կալանքի է կիրառվել:
Տիգրան Գալստյանի նկատմամբ կալանքի որոշումը կհրապարակվի հունիսի 26-ին` ժամը 11:00-ին։
Հունիսի 25-ին ԱԱԾ-ն խուզարկություններ էր իրականացրել «Սրբազան պայքար» շարժման աջակիցների բնակարաններում: Քննչական կոմիտեն հայտնել էր, որ շարժման աջակիցների տներում քննչական, վարութային գործողություններ իրականացնելու պատճառը «ՀՀ-ում ահաբեկչական և իշխանությունը զավթելուն ուղղված գործողություններ իրականացնելու» ծրագիրն էր, ինչը կանխվել է։ Կոմիտեն ավելի ուշ հրապարակել էր կառավարական կայքերի վրա կիբեռհարձակումների, զանգվածային բողոքի ցույցերին մասնակցելու համար խմբերի ձևավորման, ինչպես նաև իշխանությունը փոխելու համար ուժի կիրառման սցենարների թույլտվության մասին ձայնագրություններ։
Իշխանության զավթման փորձի շուրջ քրեական գործը հարուցվել էր Civic.am կայքի հրապարակած փաստաթղթի հիման վրա՝ որակելով այն պետության «Հեղաշրջման պլան»։
ՔԿ-ից Armenia Today-ին հայտնել էին, որ 16 անձի նկատմամբ կալանքի միջնորդություն է ներկայացվել դատարան։ Նրանց թվում է նաև Գալստանյանը։
