44-օրյա պատերազմում անհետ կորած և զոհված զինծառայողների հարազատներն ապրիլի 23-ին բողոքի ակցիա են իրականացրել Ազգային ժողովի շենքի դիմաց՝ պահանջելով իրենց բարձրացրած հարցերի կապակցությամբ հրապարակային քննարկում կազմակերպել ԱԺ-ում, ինչպես նաև հրապարակայնացնել պատերազմի հանգամանքներն ուսումնասիրող ԱԺ հանձնաժողովի զեկույցը։
Պատերազմում որդուն կորցրած Արմեն Գալստյանն ակցիայի մեկնարկին դիմել է իրավապահներին՝ Արցախյան պատերազմների նահատակների հիշատակը հարգելու նպատակով Բաղրամյան պողոտայում երթևեկությունը ժամանակավորապես դադարեցնելու խնդրանքով։ Ոստիկանության մերժումը դարձել է վիճաբանության պատճառ, ինչից հետո մասնակիցներին, այնուամենայնիվ, հաջողվել է մի քանի րոպեով արգելափակել պողոտայի երթևեկությունը։
Հարազատները պահանջել են տրամադրել ԱԺ նիստերի մեծ դահլիճը՝ հաշվի առնելով մասնակցել ցանկացողների մեծ թիվը (շուրջ 190 մարդ-խմբ.)։
ԱԺ անկախ պատգամավոր Թագուհի Թովմասյանը, որն ամբողջ ընթացքում ակցիայի մասնակիցների հետ էր, հայտարարել է, որ ԱԺ ղեկավարությունը հրաժարվել է տրամադրել մեծ դահլիճը՝ փոխարենն առաջարկելով այլ սրահ, որն ունի ընդամենը 50-60 տեղ։
«Ստացվում է՝ կա քաղաքական որոշում, որ որևէ պաշտոնյա չպետք է մասնակցի լսումներին, քանի որ նրանք պատրաստ չեն բաց քննարկումների»,- հայտարարել է պատգամավորը։
Ցուցարարների պահանջների թվում էր նաև պատերազմի հանգամանքներն ուսումնասիրող քննիչ հանձնաժողովի զեկույցի հրապարակումը, որն առ այսօր չի արվել։ Ըստ հարազատների՝ իշխանությունները տարիներ շարունակ խուսափում են հրապարակային պատասխաններից՝ նախընտրելով «դռնփակ» հանդիպումները։
Հանձնաժողովն ստեղծվել էր 2022 թվականի փետրվարին, աշխատանքը երկարացվել էր երկու անգամ։ Հաշվետվությունն ԱԺ նախագահին ուղարկվել էր միայն մեկ տարի անց՝ 2025 թվականի սեպտեմբերին։ Հոկտեմբերի 6-ին ԱԺ-ից Armenia Today-ին տեղեկացրել էին, որ զեկույցն ԱԺ արխիվ ուղարկելու որոշում է կայացվել։
Թովմասյանի պնդմամբ՝ ստեղծված իրավիճակի գլխավոր պատասխանատուն ԱԺ նախագահ Ալեն Սիմոնյանն ու ԱԺ գլխավոր քարտուղար Դավիթ Առաքելյանն են, ովքեր, ըստ նրա, խոչընդոտում են ծնողների լսված լինելու իրավունքը։
Մասնակիցներն ավելի քան երկու ժամ ակցիա անցկացնելուց հետո որոշել են դադարեցնել այն, քանի որ այսօր երեկոյան մտադիր են միանալ Հայոց ցեղասպանության զոհերի հիշատակին նվիրված ամենամյա ջահերով երթին։
Անհետ կորածների հարազատները զեկույցը հրապարակելու պահանջով ակցիա էին իրականացրել նաև մարտի 24-ին։ Այդ ժամանակ նրանք հայտարարել էին, որ ԱԺ նախագահը մերժել է զեկույցը հրապարակելու իրենց դիմումը։ Նույն հարցով նրանք 2025 թվականի վերջին նաև ստորագրահավաք էին կազմակերպել։
ԱԺ պաշտպանության և անվտանգության հարցերի մշտական հանձնաժողովի մարտի 2-ի նիստում Արդարադատության նախարար Սրբուհի Գալյանը հայտարարել էր, որ նախատեսվում է ստեղծել անհետ կորած անձանց միասնական ռեեստր։
Կարդացեք նաև՝
44-օրյա պատերազմի զեկույցն ԱԺ արխիվ ուղարկելու որոշում է կայացվել․ խոսնակ
