Իրանի Մեջլիսի Ազգային անվտանգության և արտաքին քաղաքականության հանձնաժողովի նախագահ Էբրահիմ Ազիզին խոստացել է, որ իրանցիները «կկտրեն յուրաքանչյուրի ոտքը», ով ներխուժի երկրի տարածք։
«Եթե որևէ ագրեսոր ոտք դնի Իսլամական Իրանի սուրբ տարածք, մենք կկտրենք այդ ոտքը: Իսլամական հեղափոխության ուսմունքի համաձայն, մենք որևէ պատերազմի նախաձեռնող չենք, բայց սովոր ենք վճռական և կոշտ դիմակայել ագրեսորներին»,- ընդգծել է նա IRNA-ին տված հարցազրույցում:
Նա հավելել է, որ Իսրայելը և ԱՄՆ-ն պետք է իմանան՝ եթե կեղծ պատրվակով փորձեն թեկուզ նվազագույն վնաս հասցնել իրենց ազգային անվտանգությանը, ապա աշխարհում ոչ մի տեղ իրենց ապահով չեն զգա։ Ազիզիի խոսքով՝ ԱՄՆ-ի կամ Իսրայելի հետ համագործակցող ցանկացած պետության Իրանը կդիտարկի որպես թիրախ մարտի դաշտում։
Փետրվարին ԱՄՆ նախագահ Դոնալդ Թրամփը հրամանագիր էր ստորագրել Իրանի նկատմամբ առավելագույն ճնշման քաղաքականությունը վերականգնելու մասին։ Ավելի ուշ նա հայտնել էր, որ նամակ է ուղարկել Իրանի գերագույն առաջնորդ Ալի Խամենեիին՝ միջուկային ծրագրի քննարկման առաջարկով։ Խամենեին ասել էր, որ Թեհրանը պատրաստ է պատասխանել ԱՄՆ-ի ցանկացած ագրեսիվ գործողության, ինչպես նաև մերժել էր Վաշինգտոնի հետ բանակցությունների հնարավորությունը։
