Ադրբեջանի իշխանությունները փորձում են «առևտրի» հիմքեր ստեղծել Բաքվում պահվող հայերի ցուցմունքների միջոցով, «Ազատություն» ռադիոկայանի հայկական ծառայությանը հայտարարել է Հայաստանի Ազգային ժողովի խոսնակ Ալեն Սիմոնյանը:
«Հայաստանը գիտակցում է այդ մարտավարությունը և թույլ չի տալու, չի ներքաշվելու նման սադրանքների մեջ»,- ասել է ԱԺ նախագահը:
Սիմոնյանը նշել է, որ տեղյակ չէ, թե ինչ հոգեմետ միջոցներ են կիրառվում Բաքվում պահվող հայ գերիների նկատմամբ՝ տարբեր ցուցմունքներ ստանալու նպատակով:
Ադրբեջանի ԱԳՆ-ն մեկնաբանել էր ՀՀ վարչապետ Նիկոլ Փաշինյանի հայտարարությունը, ըստ որի՝ Բաքուն արգելված հոգեմետ միջոցներով ցուցմունքներ է կորզում գերեվարված Արցախի ռազմաքաղաքական առաջնորդներից, որ օգտագործի ՀՀ-ի դեմ և տարածաշրջանային էսկալացիա հրահրի։
Բաքվի ԱԳՆ-ն «բացարձակապես անհիմն և միանգամայն անհեթեթ» էր որակել Փաշինյանի հայտարարությունը։ Ադրբեջանի ԱԳՆ-ն չէր ընդունել նաև Բաքվում պահվող հայ գերիների նկատմամբ խոշտանգումներ և դաժան վերաբերմունք ցուցաբերելու մեղադրանքները։ Բաքուն հղում էր արել Կարմիր խաչի միջազգային կոմիտեին ու նշել, թե, իբր, «հայ գերիների նկատմամբ դաժան վերաբերմունքի մասին պնդումները կեղծ են»։
Հունվարի 25-ի Հանրային հեռուստաընկերությանը տված հարցազրույցում Փաշինյանը նշել էր, որ հետախուզական տեղեկությունների համաձայն՝ գերեվարվածների նկատմամբ հոգեներգործուն արգելված միջոցներ են կիրառվում, որպեսզի տարածշրջանային էսկալացիաները հրահրելուն ուղղված խոսույթներ, ցուցմունքներ կորզեն նրանցից։
2024-ի դեկտեմբերին Բաքուն դատարան էր հանձնել Ադրբեջանում ապօրինի պահվող 15 անձանց, այդ թվում ՝ Արցախի նախկին առաջնորդների քրեական գործը։ Նրանք մեղադրվում են 2548 դրվագով։
Գործով անցնում են Արցախի նախկին նախագահներ Արկադի Ղուկասյանը, Արայիկ Հարությունյանը և Բակո Սահակյանը, ԱՀ նախկին պետնախարար, գործարար Ռուբեն Վարդանյանը, Արցախի ԱԺ նախագահ Դավիթ Իշխանյանը, ԱԳ նախկին նախարար Դավիթ Բաբայանը, պաշտպանության նախկին նախարար Լևոն Մնացականյանը, Արցախի պաշտպանության բանակի հրամանատարի նախկին առաջին տեղակալ Դավիթ Մանուկյանը, ինչպես նաև Գարիկ Մարտիրոսյանը, Մելիքսեթ Փաշայանը, Դավիթ Ալավերդյանը, Գուրգեն Ստեփանյանը, Լևոն Բալայանը, Մադաթ Բաբայանը, Վասիլի Բեգլարյանը և Էրիկ Ղազարյանը: Վարդանյանին Բաքվի բանտում ցմահ ազատազրկում է սպառնում:
Հունվարի 17-ին Բաքվում սկսվել էին Լեռնային Ղարաբաղի ութ քաղաքական և ռազմական առաջնորդների դատավարությունները: Վարդանյանին ցմահ ազատազրկում է սպառնում Բաքվի բանտում։ Նախկին պետնախարարը հունվարի 16-ի հայտարարության մեջ իր քրեական գործով բոլոր արձանագրությունները կեղծված էր անվանել և մի քանի պահանջ ներկայացրել ադրբեջանական իշխանություններին:
Վարդանյանին և Բաքվում պահվող մյուս բոլոր հայերին աջակցելու կոչ էին արել «Ավրորա» մարդասիրական նախաձեռնության համահիմնադիր Նուբար Աֆեյանը, «Տաշիր» ընկերության խմբի նախագահ Սամվել Կարապետյանը, Հայաստանի ֆուտբոլի հավաքականի նախկին ավագ Հենրիխ Մխիթարյանը և այլ գործիչներ:
