Հետախուզական տվյալներ ունենք, որ Բաքուն արգելված հոգեներգործուն միջոցներով ցուցմունքներ է կորզում հայ գերիներից, որ օգտագործի ՀՀ-ի դեմ, հայտարարել է ՀՀ վարչապետ Նիկոլ Փաշինյանը՝ պատասխանելով Հանրային հեռուստաընկերության հարցերին։
Փաշինյանի խոսքով՝ այդ մասին են վկայում հայկական հետախուզության տվյալները:
«Հետախուզական տեղեկություններ ունենք, որ այդ մարդկանց նկատմամբ հոգեներգործուն արգելված միջոցներ են կիրառում, որպեսզի տարածշրջանային էսկալացիաները հրահրելուն ուղղված խոսույթներ, ցուցմունքներ կորզեն։ Շատ մտահոգված ենք։ Այդ դատավարությունն օգտագործվելու է ՀՀ-ի դեմ»,- հայտարարել է նա:
Փաշինյանը հնարավոր է համարել այն հանգամանքը, որ բանտարկյալներից կորզած ցուցմունքներն ամենատարբեր ձևերով կօգտագործեն Հայաստանի դեմ։
«Մենք այս հարցը խորությամբ հասկանում ենք և մեզ հաշիվ ենք տալիս։ Բոլոր հասու միջոցներով փորձում ենք լուծել հարցը»,- հավելել է նա:
Վարչապետը հայտարարել է, որ Հայաստանի իշխանությունները փորձում են բոլոր հնարավոր միջոցներով լուծել բանտարկյալների խնդիրը։ Փաշինյանի խոսքով՝ ներկայումս կան գերտերություններ, որոնք նման իրավիճակում են և տարիներ շարունակ չեն կարողանում լուծել գերեվարվածների խնդիրը:
Փաշինյանը նաև նշել է, որ տարածաշրջանում և դրանից դուրս կան ուժեր, որոնք ՀՀ-ի դեմ սպառնալիք և նոր էսկալացիա գեներացնելու խնդիր են դրել։ Նա հավելել է, որ Բաքվում պահվող հայերից որևէ մեկին իր քաղաքական հակառակորդը չի համարում։
2024-ի դեկտեմբերին Բաքուն դատարան էր հանձնել Ադրբեջանում ապօրինի պահվող 15 անձանց, այդ թվում՝ Արցախի նախկին առաջնորդների քրեական գործը։ Նրանք մեղադրվում են 2548 դրվագով։
Գործով անցնում են Արցախի նախկին նախագահներ Արկադի Ղուկասյանը, Արայիկ Հարությունյանը և Բակո Սահակյանը, ԱՀ նախկին պետնախարար, գործարար Ռուբեն Վարդանյանը, Արցախի ԱԺ նախագահ Դավիթ Իշխանյանը, ԱԳ նախկին նախարար Դավիթ Բաբայանը, պաշտպանության նախկին նախարար Լևոն Մնացականյանը, Արցախի պաշտպանության բանակի հրամանատարի նախկին առաջին տեղակալ Դավիթ Մանուկյանը, ինչպես նաև Գարիկ Մարտիրոսյանը, Մելիքսեթ Փաշայանը, Դավիթ Ալավերդյանը, Գուրգեն Ստեփանյանը, Լևոն Բալայանը, Մադաթ Բաբայանը, Վասիլի Բեգլարյանը և Էրիկ Ղազարյանը: Վարդանյանին Բաքվի բանտում ցմահ ազատազրկում է սպառնում:
Հունվարի 17-ին Բաքվում սկսվել էին Լեռնային Ղարաբաղի ութ քաղաքական և ռազմական առաջնորդների դատավարությունները: Վարդանյանին ցմահ ազատազրկում է սպառնում Բաքվի բանտում։ Նախկին պետնախարարը հունվարի 16-ի հայտարարության մեջ իր քրեական գործով բոլոր արձանագրությունները կեղծված էր անվանել և մի քանի պահանջ ներկայացրել ադրբեջանական իշխանություններին:
Վարդանյանին և Բաքվում պահվող մյուս բոլոր հայերին աջակցելու կոչ էին արել «Ավրորա» մարդասիրական նախաձեռնության համահիմնադիր Նուբար Աֆեյանը, «Տաշիր» ընկերության խմբի նախագահ Սամվել Կարապետյանը, Հայաստանի ֆուտբոլի հավաքականի նախկին ավագ Հենրիխ Մխիթարյանը և այլ գործիչներ:
Հունիսի 22-ին Փաշինյանն ԱԺ-ում ասել էր, որ Բաքվում պահվող բանտարկյալների հարցում, առաջին հերթին, կարևորը չվնասելն է։ Նա հավելել էր, որ բանտարկյալների հարցով կարող է հայտարարություն անել, որը «կբավարարի հայրենասիրական էմոցիաները», սակայն մտավախություն ունի, որ դրա հետևանքները «մարդիկ զգալու են բանտում՝ իրենց մաշկի վրա»։
