Ադրբեջանի նախագահ Իլհամ Ալիևը մտադիր է մինչև ընտրություններ Հայաստանին վերադարձնել 11 հայ ռազմագերու, հայտնել է «Հրապարակ» օրաթերթը։
Ըստ պարբերականի տեղեկությունների՝ առաջին խմբում կլինի 8, իսկ երկրորդում՝ 3 գերի։ Նշվում է, որ խոսքը 2020 թվականից Բաքվի բանտերում պահվող անձանց մասին է, սակայն գործընթացը չի վերաբերում Արցախի ռազմաքաղաքական ղեկավարությանը։
Աղբյուրի փոխանցմամբ՝ Ալիևն այս քայլով հույս ունի նպաստել վարչապետ Նիկոլ Փաշինյանի վերընտրությանը։
Պաշտոնական տվյալներով՝ Ադրբեջանում շարունակում է մնալ 19 հայ գերի։
Արցախի նախկին ղեկավարները դատապարտվել էին 20 տարվա ազատազրկումից մինչև ցմահ ազատազրկման: Ալիևը բացառել էր նրանց վաղաժամ ազատման հնարավորությունը։
Կարմիր խաչի միջազգային կոմիտեի գրասենյակի փակվելուց հետո 2025 թվականի սեպտեմբերից որևէ միջազգային կառույց չի այցելել հայ գերիներին։
Արցախի նախկին պետնախարար Ռուբեն Վարդանյանը դիմել էր Հայաստանի մարդու իրավունքների պաշտպան Անահիտ Մանասյանին՝ կոչ անելով այցելել ռազմագիրիներին: Մանասյանը, պարզաբանել էր, որ պաշտպանի գրասենյակի լիազորությունները սահմանափակված են ՀՀ պետական և տեղական մարմինների կողմից մարդու իրավունքների խախտման դեպքերով։
