Մինչև 60 տոկոս հարստացված ուրանի մեծ մասը գտնվում է Իրանի միջուկային օբյեկտների ավերակներում, 400 կիլոգրամ ուրանը պետք է լինի այնտեղ, որտեղ գտնվել է հարվածներից առաջ, սակայն անհայտ է, թե այդ քանակից որքանն է պահպանվել, հայտարարել է Իրանի արտգործնախարար Աբբաս Արաղչին։
«Մենք չենք պատրաստվում դրանք հանել փլատակներից, մինչև նրանք պատրաստ չլինեն։ Իհարկե, մենք չգիտենք, թե այդ 400 կիլոգրամից քանիսն է մնացել և քանիսն է կորել, չենք էլ իմանա, մինչև չհանենք փլատակներից»,- ասել է Արաղչին։
«Ալ Ջազիրա»-ին տված հարցազրույցում Արաղչին ԱՄՆ-ի կողմից Իրանի միջուկային օբյեկտներին հասցված հարվածների վնասը որակել է որպես «հսկայական» և նկարագրել շենքերի ու սարքավորումների ավերածությունները։ Այնուամենայնիվ, նա ընդգծել է, որ տեխնոլոգիան «չի ոչնչացվել», ինչպես նաև նշել է, որ «իրենց վճռականությունը չի մարել, ընդհակառակը՝ պատերազմից հետո այն ավելացել է»։
Ավելի վաղ Արաղչին հայտնել էր, որ Թեհրանն ու Վաշինգտոնը մոտ էին միջուկային համաձայնագրին, բայց Իսրայելին հաջողվել էր համոզել ԱՄՆ-ին հարձակվել Իրանի վրա։
2025 թվականին Իրանի և ԱՄՆ-ի միջև միջուկային հարցի շուրջ հինգ փուլ բանակցություններն ավարտվել էին առանց արդյունքի՝ Իսրայելի կողմից Իսլամական Հանրապետության դեմ իրականացվող ռազմական գործողությունների և ամերիկյան զինված ուժերի հարվածների ֆոնին։ Սեպտեմբերի 23-ին Իրանի գերագույն առաջնորդ Ալի Խամենեին հայտարարել էր, որ Վաշինգտոնի հետ երկխոսությունը «չի բխում երկրի ազգային շահերից», քանի որ ամերիկյան կողմը բանակցություններ չի վարում, այլ թելադրում է սեփական պայմանները։
