Թուրքիայի խորհրդարանի «Դեմոկրատական կուսակցության» ասորի պատգամավոր Ջորջ Ասլանն արտահերթ ելույթ է ունեցել Հայոց ցեղասպանության մասին, հայտնել է Ermenihaber-ը։
Ելույթի սկզբում նա հիշատակել է նախորդ դարասկզբի ողբերգական իրադարձություններին զոհ գնացած հայերին, ասորիներին և մյուս բոլոր ժողովուրդներին։
«Խորհրդարանում գտնվող բոլոր քաղաքական կուսակցությունների խմբակցություններին ունեմ մի հարց․ 1915թ. Թուրքիայի 13 միլիոն բնակչության 3 միլիոնը կազմում էին քրիստոնյա ժողովուրդները։ Այսօր բնակչությունը 86 միլիոն է, բայց քրիստոնյաների թիվը ընդամենը 50 հազար է: Ի՞նչ եղավ այդ 3 միլիոն քրիստոնյաների հետ։ Ուրեմն ինչո՞ւ է այսօր Թուրքիայի բնակչությունը 86 միլիոն, իսկ այս մարդկանց թիվը՝ 50 հազար»,- հարցրել է նա:
Ասլանը նկատել է, որ այդ հարցին պատասխան տալով միայն Թուրքիայում կլինի իրական ժողովրդավարություն, հակառակ դեպքում՝ ոչ։
Ասլանին ելույթի ընթացքում անընդհատ վիրավորական ռեպլիկներով փորձել է ընդհատել իշխանական պատգամավոր, հավաքականի նախկին ֆուտբոլիստ Ունալ Քարամանը։ Ասորի պատգամավորը վերջինիս հակադարձել է. «Դե վեր կացեք, տղամարդավարի պատասխանեք այդ հարցին»:
Լեզվակռիվն ավարտվել է խոսափողների անջատմամբ և Քարամանի արձագանքով՝ «պատմաբաններին հարցրու»:
Պաշտոնական Անկարան ոչ միայն չի ճանաչում Հայոց ցեղասպանությունն ու ժխտում է այն, այլև տարբեր դիվանագիտական միջոցներով այս տարիներին պայքարել է դրա ճանաչման դեմ:
Կարդացեք նաև`
Ականատեսների հուշեր և փաստեր. Հայոց ցեղասպանության մասին գրքերի ընտրանի
Դիվանագիտության և հիշողության միջև. ինչպե՞ս է Հայաստանի արտաքին քաղաքականությունը հասել Ցեղասպանության միջազգային ճանաչմանը
Ուրուգվայից մինչև ԱՄՆ. Հայոց ցեղասպանության ճանաչման ուղին
