Ադրբեջանի արտաքին գործերի նախարարությունը պահանջել է պատժել ապրիլի 23-ին Հայոց ցեղասպանության 110-ամյակին նվիրված ջահերով երթի ժամանակ Երևանում, ինչպես նաև ապրիլի 24-ին Փարիզում հայ համայնքի հավաքի ժամանակ ադրբեջանական դրոշն այրելու համար պատասխանատուներին։
Բաքուն այդ արարքը գնահատել է որպես «ռևանշիստական տրամադրությունների դրսևորում՝ հիմնված Հայաստանում և նրա սահմաններից դուրս էթնիկ ատելության վրա»։
«Հայաստանի և Ֆրանսիայի կառավարությունները պետք է ժամանակին կանխեին նման արշավները, որոնք խոր արմատացած էթնիկ ատելության մարմնացում են, և ձեռնարկեին համապատասխան նախազգուշական միջոցներ»,- նշել է ադրբեջանական գերատեսչությունը։
Ապրիլի 23-ին ՀՅԴ կուսակցության երիտասարդական թևի կողմից Երևանում հազարավոր քաղաքացիների մասնակցությամբ տեղի էր ունեցել ավանդաբար կազմակերպվող ջահերով երթը դեպի Ծիծեռնակաբերդի հուշահամալիր՝ ի հիշատակ 1915-1923 թվականներին Օսմանյան կայսրությունում իրականացված ցեղասպանության անմեղ զոհերի։ Հանրապետության հրապարակում երթի մասնակիցներն այրել էին Ադրբեջանի և Թուրքիայի դրոշները:
Ապրիլի 24-ին ՀՀ վարչապետի մամուլի քարտուղար Նազելի Բաղդասարյանը հայտարարել էր, որ Նիկոլ Փաշինյանը Թուրքիայի և Ադրբեջանի դրոշների այրումը Երևանում ջահերով երթի ժամանակ համարում է «սադրիչ գործելակերպ»։ Բաղդասարյանի խոսքով՝ վարչապետը դատապարտում է այս գործելակերպը և այն համարում է «անպատասխանատու և անընդունելի»։
Ապրիլի 24-ին լրացել էր Օսմանյան կայսրության կողմից 1915 թվականին հայերի նկատմամբ իրականացված Ցեղասպանության 110-րդ տարելիցը։ Աշխարհասփյուռ հայությունը ոգեկոչման միջոցառումներով հիշել է 1,5 միլիոն անմեղ զոհերի հիշատակը։ Հայոց ցեղասպանությունը պաշտոնապես ճանաչել է 34 պետություն, ավելի քան 70 կազմակերպություն։ 110 տարի անց Թուրքիան շարունակում է ժխտել Մեծ եղեռնի իրողությունը և պայքարում է Ցեղասպանության միջազգային ճանաչման դեմ՝ նենգափոխելով պատմությունը։
Մարտին Փաշինյանը թուրքական լրատվամիջոցներին տված հարցազրույցում հայտարարել էր, որ Հայոց ցեղասպանության միջազգային ճանաչումը պաշտոնական Երևանի արտաքին քաղաքական առաջնահերթություններից չէ։
Հայոց ցեղասպանության ճանաչման պահանջն սկիզբ է առել դեռևս Խորհրդային Միության տարիներից։ 1965 թվականի մայիսին Ուրուգվայը դարձել է աշխարհում Հայոց ցեղասպանությունը ճանաչած առաջին երկիրը։ Հայոց ցեղասպանությունը ճանաչել են մի քանի տասնյակ երկրներ՝ Ռուսաստան, Ֆրանսիա, Իտալիա, Գերմանիա, Հոլանդիա, Բելգիա, Լեհաստան, Լիտվա, Սլովակիա, Շվեդիա, Շվեյցարիա, Հունաստան, Կիպրոս, Լիբանան, Կանադա, Վենեսուելա, Արգենտինա և Վատիկան։ Հայոց ցեղասպանությունը ճանաչվել է նաև ՄԱԿ-ի Գլխավոր ասամբլեայի, Եվրոպական խորհրդարանի, Եվրոպայի խորհրդի, Եվրոպական Միության, Եկեղեցիների համաշխարհային խորհրդի և այլ միջազգային կազմակերպությունների կողմից։ Հայերի ցեղասպանությունը ճանաչվել է Ամերիկայի և այլ երկրների մոտ հարյուր նահանգների, նահանգային խորհուրդների և այլ կառույցների կողմից։
